Газрын алба тойрсон луйвар газар авсаар удсаныг хэн хүнгүй л ярьдаг. Хятадуудад хэдэн га-гаар нь газар өгсөн нь илчлэгдэж шоронгийн хаалга татсан хүн ч Газрын албаны дарга нарын дунд байдаг. Тэгвэл бас нэгэн Газрын алба тойрсон гомдол шүүхийн өмнө очоод байгаа тухай одоо өгүүлье.

Баянгол дүүргийн Газрын албаны дарга Г.Мөнхбаатар, экс дарга Бямбадорж нар иргэдийг хүнд суртлаар чирэгдүүлдэг, эцэст нь газрыг нь боловсон аргаар дээрэмдэж авдаг тухай гомдол Нийслэлийн Захиргааны хэргийн шүүх дээр овоорч буй мэдээлэл байна.

Тэдний технологи тун энгийн. Иргэдийн гэр бүлийн зориулалтаар эзэмшиж буй газрын эзэмших хугацааг сунгах өргөдлийг хав дарчихдаг, эцэст нь өөр хүнд шилжүүлж өгөөд л иргэдийг хохироодог аж.  Ном журмын дагуу өргөдлөө гаргасан, газрын төлбөрөө ганц ч төгрөг дутаалгүй төлсөөр ирсэн хүмүүс эцсийн дүндээ Г.Мөнхбаатар даргын хүнд суртлыг мөргөөд гацдаг ийм тохиолдол олон гэнэ.

Үүнээс ч ноцтой нь аль ч намын үед албан тушаалдаа үлдэж чаддаг Г.Мөнхбаатар даргыг иргэдээс хураасан газрыг эцэст нь өөрөө “эргэлтэд оруулдаг”  гэсэн яриа дүүргийн Газрын алба хавиар их яригддаг гэх. Үнэн эсэхийг нь мэдэхгүй ч баримтаа барьчихсан, газраа дээрэмдүүлсэн гэх хүмүүсийн төлөөлөл ноцтой зүйлс ярьсаар байгаа юм. Тухайлбал, нэгэн эх сурвалж, “Би Баянгол дүүргийн Засаг даргын захирамжтай газар эзэмшдэг байсан. Гэтэл миний газрын эзэмших хугацаа нь дуусаагүй байхад өөр иргэдэд нэг дор өгчихсөн байсан. Учрыг нь лавлахаар асуудлыг шийднэ гэсээр эцсийн дүндээ миний газрын хугацааг нь дуусгаад булаагаад авчихсан. Миний төлбөрөө төлсөн, эзэмшиж байгаа газрыг нэг өдөр, нэг захирамжаар хүмүүст эзэмшүүлснээ нэг захирамжаар буцаагаад өөр нэг хүний нэр дээр шилжүүлчихсэн байсан нь хардлага төрүүлж байна” гэж ярьсан юм.

Үүнийг л Баянголын Газрын албаныхан газрын дээрэмд гаршсан гэж иргэд яриад байгаа юм. Үгүй ээ, энэ дээрэм биш гэж үзвэл Газрын албаныхан ажлаа мэддэггүй, албан тушаалдаа эзэн болж чаддаггүй гэсэн юм. Нэг хүнд хууль ёсоор өгчихсөн газрыг хугацаа нь дуусаагүй байхад нөгөө хүнд шилжүүлж өгч байгааг ажлаа мэддэггүй л гэхээс өөрөөр тайлбарлах арга алга.

Хамгийн ноцтой нь эхлээд хүний газрыг олон хүнд хувааж эзэмшүүлээд, эцэст нь нэг дор буцааж төвлөрүүлж өгч байгаа нь анхаарал татаж байна. Саяхан УИХ-ын гишүүн Б.Энхбаяр “УИХ 2018 онд бүртгэлийн багц хуулийг баталсан. burtgel.mn сайтад газрын мэдээллийг ил тод болгоно гэж заасан ч одоо болтол хэрэгжихгүй байна. Зарим газрын албаныхан хамаарал бүхий этгээдийн нэр дээр 80 орчим газар авсан, зардаг гэсэн мэдээлэл байдаг. Үүнийг шийдэхийн тулд  хуулийг хэрэгжүүлэх ёстой” гэсэн юм. Арай эрхэм гишүүн Б.Энхбаярын хэлсэн “Зарим газрын алба...” гэдэгт Баянгол дүүргийн Газрын алба багтаж байгаа юм биш биз дээ. Нягтлах л ёстой юм... “Тунгалаг Тамир” кинон дээр “Хүрээний булайг ухаад байвал далай, далай...” гэдэг шиг Баянголын Газрын албаныхны энэ мэт үйлдлийг ухаж үзвэл юун далай ч болж мэдэх л юм...