УИХ-ын гишүүн Б.Пүрэвдорж НӨАТ-ын шимтгэлийг бууруулах хуулийн төсөл өргөн барьсан талаар мэдээлэл хийлээ.

Тэрбээр “Нэмэгдсэн өртөгийн албан татварыг 10 хувь биш таван хувь болгох хуулийн төсөл өргөн барилаа. Миний бие өнгөрсөн парламентад уг хуулийн төслийг өргөн барьсан ч олонхийн саналыг авч чадаагүй.

Шинэ УИХ байгуулагдсантай холбоотойгоор дахин өргөн барилаа. Өнөөдөр улс оронд цар тахалтай хоблоотой эдийн засгийн хүндрэл бий болсон. Өнгөрсөн хугацаанд Ковид-ийн хуулиар Засгийн газар 5.1 их наяд төгрөгийн хөтөлбөрийг хэрэгжүүлсэн. Уг хөтөлбөр зорилтот бүлэгтээ бүрэн дүүрэн хүрсэн бол нэг иргэнд 1.6 сая төгрөг очсон байх ёстой. Харамсалтай нь Засгийн газрын хэрэгжүүлсэн хөтөлбөр байгаа оносон гэхэд эргэлзээтэй.

НӨАТ-ын хувь хэмжээг бууруулах замаар иргэн, аж ахуйн нэгжийг дэмжих, орлогыг хамгаалах боломж бий болно гэж үзэж байна.

Энэ онд 2.7 их наяд төгрөгийн татвар авах ёстой. Харин НӨАТ-ын хувь хэмжээг бууруулснаар 1 орчим их наяд төгрөгийг иргэдэд буцааж өгөх юм. Хуулийн төсөлтэй холбоотой зарим зүйлийг Сангийн яам эсэргүүцдэг. Учир нь төсвийн орлого буурна гэж үздэг юм. Энэ жилийн хувьд 37 хувиар орлогын татвар нэмэгдэнэ гэсэн тооцоо гарсан. Иргэд НӨАТ-ын баримт авснаар далд орлогууд ил болж, татварын орлгого нэмэгддэг. Тэгвэл НӨАТ-ын хувь хэмжээ багасгаснаар татварын бааз суурь нэмэгдэж, төсвийн орлого буурахгүй байх боломж бүрдэнэ гэж харж байна.

Татварын бааз суурь нэмэгдсэнээр татварын орлого нэмэгдэх юм.

Тухайлбал, үр тарианы комданиуд хамгийн гол зардал болох шатахууныгаа 10 хувийн НӨАТ-тэй авдаг. Тариагаа ургуулчихаад гурилын үйлдвэрт нийлүүлэхдээ 10 хувийн НӨАТ-ын зардлаа нэмж тусгаад өгдөг. Гурилын үйлдвэр нь талхны үйлдвэрт, талхны үйлдвэр нь дэлгүүрт 10 хувийн НӨАТ-ын нэмэгдэлтэй нийлүүлдэг. Дэлгүүр нь иргэдэд талхаа зарахдаа мөн л нэмж өгдөг. Үйлдвэрлэлийн шат бүрт авч байгаа татвар хамгийн багадаа 300-400 төгрөгийн нэмэгдлийг бий болгож байна. Тиймээс энэ хуулийн төслийг өргөн барилаа” гэлээ.

Б.Лхам