Энэ удаагийн парламентын дөрвөн жил өмнөх парламент шиг фракц үүсгээд хоорондоо талцаад байхгүй  үр бүтээлтэй дөрвөн жил болж магадгүй. Ийн хэлэхийн учир нь ээлжит бус чуулган дөнгөж нээгдээд л гишүүд үзэл бодлоороо нэгдэж хэд хэдэн лобби бүлэг байгуулав. Үүнээс хамгийн анхаарал татаж, иргэдийн дунд шүүмжлэл дагуулж байгаа нь  Кэмбрижийн хөтөлбөрийг дэмжих лобби бүлэг.

Бүлэгт УИХ-ын гишүүн Н.Учрал, Г.Дамдинням, Х.Булгантуяа нарын таван гишүүн багтаж буй юм. Харин шүүмжлэл дагуулсан гэдэг нь бүх хичээл гадаад хэл дээр явагдана гэсэн ойлголт нийгэмд үүссэнтэй холбоотой. Энэ нь хүүхдүүдийг ерөнхий боловсролын сургуулиа төгсөхөд хос хэлтэй болгож төгсгөх бөгөөд эх хэл дээр нь тулгуурлаж хичээлийг заах бол комьпютер, бизнес чиглэлийн англи хэлийг гүнзгийрүүлж заах юм. 

Кэмбрижийн хөтөлбөрийн гол зорилго нь хүүхдүүдэд тэгш боломжийг бий болгох. Энэ жилийн хувьд Сонгинохайрхан дүүрэгт Кэмбрижийн стандартад нийцсэн нэг сургууль ашиглалтад ороод туршиж байна. Ингэхдээ эхний хоёр жилдээ лабораторийн төвшинд хөгжүүлж, гурав дахь жилээс нь Кэмбрижийн хөтөлбөрийг бүрэн хэрэгжүүлэх зэргээр хичээл явах юм байна лээ.

Уг хөтөлбөрийг улсын хэмжээнд үе шаттай хэрэгжүүлэх бөгөөд гол нь боловсролын нэг л стандартыг бий болгох.  

Манай улсын хувьд 2012 онд Английн Засгийн газартай хамтран Үндэсний цөм хөтөлбөр хэрэгжүүлж байсан. Улмаар лаборатори сургуулиуд бий болж үүнээс боловсролын тэгш байдал алдагдсан гэж УИХ-ын гишүүн Н.Учрал учирласан юм. 

Үнэхээр хүүхдүүдэд тэгш боловсролын тэгш боломжийг олгож байгаа нь сайн хэрэг. Хувийн сургуулиас дутахааргүй боловсрол эзэмшүүлж, амьдралд бэлтгэнэ гэж байхад мэдээж алга ташилгүй яахав.

Гэхдээ үүнээс урьтаж карантины ялгаварлыг зогсоомоор байна гишүүд ээ. Цар тахлын улмаас хөл хорионы дэглэм тогтоож хүүхдүүдийн хичээл, тухайн цаг хугацаанд олж авах байсан мэдлэг найман сараар ухарлаа.

Гэтэл карантины хугацааг сунгасантай холбогдуулан улсын сургууль хичээлийн гурав хоног, хувийн сургуулиуд хичээлийн тав хоногийг танхимаар орж байна. 

Эндээс эхлээд л төр хүүхдүүдээ ялгаварлаж байна. Улсын сургууль тав хоног хичээллэхээр халдвар гарна, хувийн сургууль тав хоног хичээлийн үйл ажиллагаагаа явуулахад халдвар гарахгүй гэж хэн хэлээд байгаа юм бэ, УОК-ынхоон. Тайлбарлаж өгнө үү.

Хувийн сургууль хичээлээ шахаж заадаг. Тэгвэл энгийн сургуульд сурч байгаа хүүхдүүд олж авах мэдлэгээ долоо хоногт хоёр хоногоор, өдөр бүр 10 минутаар алдаж байна. Та бүхний яриад байсан боловсролын тэгш бус байдал улам гаарах нь байна. Кэмбрижийн ялгавралаас өмнө карантины ялгавралаа зогсооё.

Б.Лхам