Тархины саажилттай болон тулгуур эрхтэний бэрхшээлтэй хүүхдүүдэд боловсролын болон сэргээн засах эмчигээ, үйлчилгээ үзүүлэх хоёр дахь цогцолборыг Сонгинохайрхан дүүрэгт байгуулах, түүний газрыг сонгох асуудлаар Боловсрол, шинжлэх ухааны сайд Л.Цэдэвсүрэн, Барилга, хот байгуулалтын сайд Б.Мөнхбаатар, Хууль зүй, дотоод хэргийн сайд Х.Нямбаатар, Улсын Их Хурлын гишүүн Б.Жаргалмаа нар өчигдөр тус дүүрэгт ажиллалаа.
Боловсрол, шинжлэх ухааны яамнаас тусгай хэрэгцээ шаардлагатай хүүхдийг ердийн цэцэрлэг, ерөнхий боловсролын сургуульд тэгш хамруулах бодлого баримталж байгаа ч хүүхдийн онцлог хэрэгцээнээс хамаарч тусгай цэцэрлэг, сургуульд элсүүлэн сургахаас аргагүй. Энэ цогцолбор нь ердийн сургууль, цэцэрлэгт явахад илүү бэрхшээлтэй хэсэг буюу байнгын асаргаатай, саажилттай хүүхдүүдэд боловcролын болон сэргээн засах эмчилгээ, нийгмийн хөгжил, хамгааллын үйлчилгээг үзүүлэх юм.
Цэцэрлэг, бага сургуулийн цогцолбор Сонгинохайрхан дүүргийн тавдугаар хорооны нутаг дэвсгэрт баригдах боловч нийслэлийн баруун тал, цаашлаад баруун аймгуудын тусгай хэрэгцээ шаардлагатай хүүхдийг хамруулан сургана гэж Боловсрол, шинжлэх ухааны яам үзэж байна. Цогцолбор ашиглалтад орсноор Баянгол дүүрэг дэх 70 дугаар сургууль, Яармаг дахь 63 дугаар сургуулийн ачаалал буурна.

Сонгинохайрхан дүүргийн хэмжээнд хөгжлийн бэрхшээлтэй 8000 гаруй иргэн, тэдний 1100 гаруй нь хүүхэд ажээ. Орон нутгийн зүгээс өөрийн нөөц бололцоогоор Хөгжлийн бэрхшээлтэй иргэдэд үйлчлэх төвийг байгуулсан анхны дүүрэг гэдгээ энэ үеэр танилцуулж байлаа.