Орон нутгийн сонгуульд АН, МАХН, ШИНЭ нам эвсэж оролцохоо мэдэгдсэн нь саяхан. Тэгвэл ядуурал, ажилгүйдэлд хамгийн ихээр нэрвэгдсэн Сонгинохайрхан дүүрэгт нэр дэвшин өрсөлдөх эвслийн удирдлага, жирийн гишүүд тус дүүргийн ҮI хороо буюу Ханын материалд мэдээлэл хийлээ. Энэ газрыг онцолж сэтгүүлчдэд зар тараасан нь учиртай. Нийслэлийн Засаг дарга асан Э.Бат-Үүл дөрвөн жилийн өмнө энэхүү газарт Нийслэлийн төр, захиргааны төв байгууллагыг нүүлгэхээр төлөвлөхөд иргэд талархан хүлээн авч байв. Гэвч эрх баригч МАН олонх болохдоо энэхүү төлөвлөсөн ажлыг гацааснаар сонгинохайрханчуудын хөгжлийн эсрэг үйл ажиллагаа явуулан Яармагт барьж байна. Тэд иргэдтэйгээ ойр байхыг дэмжихгүй, дархан цаазат уулынхаа бэлд байхыг илүүд үзлээ. Хэрэв Ханын материалд Нийслэлийн төр, захиргааны байгууллагыг нүүлгэсэн бол эндэхийн иргэдийн газар үнэд орж, хөгжил ундрах байлаа гэж Сонгинохайрхан дүүргийн Ардчилсан намын даргын үүрэг гүйцэтгэгч Б.Төгөлдөр үзэж байна.

Мөн МАН-ын дарангуйллын эсрэг монголчууд бүгд эвсэх хэрэгтэй байна. Энэ нь ядуурал, авлига, ажилгүйдлийн эсрэг эвсэл юм. Яагаад гэхээр МАН-ын удирдлага ард түмнээсээ дэндүү тасарсан байна.

Тэдний алдааг засахын тулд эвсэх хэрэгтэй. Ажилгүйдэл хэтэрлээ, өрхийн орлого багаслаа гэхэд тэд сонсохгүй байна. Тиймээс энэ сонгуульд ард түмэн Ардчилсан нам, МАХН, ШИНЭ нам, Иргэний зориг, Ногоон намтайгаа эвсэж, МАН-ын дарангуйллыг таслан зогсоож, тэр хүмүүсийн сонсохгүй байгаа чихний бөглөөсийг гаргаж, харахгүй байгаа нүднийх нь өмнөх халхавчийг тайлж, дэргэдээс нь хэлж зөвлөн ядуу амьдралаа засах хэрэгтэй гэж бид эвсэж байгаа юм.

Монголчууд МАН-ыг хангалттай дэмжсэн. Одоо ядуурлын эсрэг тэмцэж, эвслийн төлөө саналаа өгөх цаг ирлээ гэж Монгол Улсын Ерөнхийлөгч асан, МАХН-ын дарга Н.Энхбаяр онцолж хэллээ.

Түүнчлэн долоон жилийн өмнө энэ газарт Нийслэлийн төр, захиргааны байгууллагын шавийг тавьж, дэд бүтэц, дулаан, цахилгааны асуудлыг нэг мөр болгоход МАН энэ ажлыг зогсоож, Яармагт шилжүүлж, олигархиудад зориулсан шийдвэр гаргасан гэж хэлэх хүн олон байв. Эцэст нь энд ажилгүйдэл, агаарын болон хөрсний бохидол санаа зовоож байгаа нь туйлын үнэн. Мөн хот тохижилт, авлига, иргэдэд тэгш бус үйлчилдэг зэрэг олон зарчим алдагдаж байгааг ч бүгд мэднэ. Тэгвэл иргэддээ хүртээмжтэй, хүн бүрт хууль дүрэм тэгш үйлчилдэг нөхцөлийг бүрдүүлэхийн төлөө АН “Хариуцлагатай Улаанбаатар”, “Хариуцлагатай хот” гэсэн уриатай мөрийн хөтөлбөрөөр ажиллаж байгаагаа энэ үеэр дуулгалаа. Эвсэл гэлтгүй иргэний хөдөлгөөнийхөн Сонгинохайрхан дүүрэгт нэгдсэн дүгнэлт хийн энэ байдлыг өөрчлөх ёстой гэж улс төрийн хүчнүүд нэгдсэн юм байна. Сонгинохайрхан дүүрэгт сүүлийн 30 жил засагласан МАН юу хийв, юуг хийж чадаагүй вэ, юу хийх ёстой байсан гэдгийг энэ сонгуулиар ард түмэн эцэслэн шийдвэрлэж чадна гэдэгт итгэж буйгаа дуу нэгтэй хэллээ.

Б.Жаргал