Тагнуулын ерөнхий газрын дарга асан Д.Гэрэлийг ЗГХЭГ-ын дарга Л.Оюун-Эрдэнийг тагнаж, чагнасан хэрэгт АТГ-аас шалгаж, хэрэг бүртгэлтийн ажиллагааг эхлүүлжээ. ЗГХЭГ-ын дарга Л.Оюун-Эрдэнэ энэ асуудлаараа УИХ-ын Тусгай хяналтын дэд хороонд хандсан ба "Хууль бусаар хүний утсыг чагнах, хууль бусаар албан тасалгаанд үзлэг нэгжлэх хийх, хэн нэгний хойноос хүн тавьж, мөрдөн мөшгүүлж болохгүй. Энэ нь хууль зөрчсөн ноцтой үйлдэл” гэж байв.

Өмнө нь ч ийм тохиолдол гарч байв. Ерөнхий сайд У.Хүрэлсүхийг Шадар сайд байхад араас нь мөрдөж мөшгисөн, УИХ-ын гишүүн Т.Аюурсайханы гэрт чагнах төхөөрөмж тавьсан байсан зэргийг дурдаж болно. Төрийн өндөр дээд албан тушаалтнуудыг тагнаж, чагнах нь хэвийн үү. Энэ талаар АН-ын гишүүн Л.Эрхэмбаяр цахим хуудсаараа дамжуулж “Монголд хууль алга. Хууль бусаар тагнах, чагнах нь хэвийн үзэгдэл болжээ. Иргэн таны нууц байхгүй болсон шүү” хэмээн жиргэж байсан билээ.

Мөрдөн шалгах нууц ажиллагааг зөвхөн прокурорын зөвшөөрөлтэй явуулдаг

УЕПГ-ын Тусгай хяналтийн хэлтсийн дарга Д.Дагвасүрэн “Монгол Улсын Үндсэн хуулийн 16 дугаар зүйлд  “ халдашгүй, чөлөөтэй байх эрх”, “хуульд заасан үндэслэл журмаас гадуур ...хэнийг ч хууль бусаар мөрдөн мөшгихийг ..,  хориглоно” гэж заасан. Тагнаж, чагнах нь Монгол Улсын иргэний үндсэн эрхтэй  холбоотой учраас прокурорын байгууллагаас онцгой анхаарч хяналт тавьдаг. Гүйцэтгэх ажлын тухай хуульд Авлигатай тэмцэх, Тагнуулын ерөнхий газар, Цагдаагийн ерөнхий газар, Шүүхийн шийдвэр гүйцэтгэх ерөнхий газар  зэрэг байгууллага гүйцэтгэх ажиллагаа явуулах эрхтэй. Эдгээр байгууллагаас Гүйцэтгэх ажлын тухай хуулийн 23 дугаар зүйлд заасан үндэслэл мөн Эрүүгийн хэрэг хянан шийдвэрлэх тухай хуульд зааснаар “мөрдөн шалгах нууц ажиллагаа”-г зөвхөн прокурорын зөвшөөрөлтэй явуулахаас бусад ямар ч тохиолдолд, байгууллага, хувь хүнд бусдыг чагнаж, тагнах эрх олгоогүй юм. Хуулиар эрх олгосон этгээд хууль зөрчиж, эрхийг нь олгоогүй этгээд бусдыг чагнасан, тагнасан байвал эрүүгийн хариуцлага хүлээнэ. Хэн нэгэн иргэнийг дуртай байгууллага нь тагнаж, чагнаад байдаггүй. Монгол Улсын Их Хурлын тухай хуулийн 34 дүгээр зүйлд зааснаар “гишүүний бүрэн эрхийн баталгаа”-г хуулиар хамгаалсан.

Харин хууль зөрчиж гүйцэтгэх ажиллагаа явуулсан бол Эрүүгийн хуулийн 21.13 дугаар зүйл “Гүйцэтгэх ажлын хууль зөрчих” гэсэн хэргээр эрүүгийн хариуцлага хүлээнэ. Эрх олгоогүй хувь хүн, хуулийн этгээд бусдыг чагнаж, тагнасан тохиолдолд Эрүүгийн хуулийн 13.10 дугаар зүйл “хувь хүний нууцад халдах”, 13.12 дугаар зүйл “хүнийг хууль бусаар мөрдөн мөшгих” зэрэг зүйл ангиар эрүүгийн хариуцлага хүлээх хуулийн зохицуулалттай гэв.