УИХ-ын ээлжит сонгууль хамгийн олон бие даагч өрсөлдсөнөөрөө онцлог болж өнгөрсөн. 121 бие даагчдаас нэг л хүн ялалт байгуулсан нь УИХ-ын гишүүн Н.Алтанхуяг юм.

Тэгвэл удаах шатны сунгаанд ч мөн адил өмнө жилүүдтэй харьцуулахад хамгийн олон бие даагч нэрээ дэвшүүлжээ. Тодруулбал, Аймаг, нийслэл, сум, дүүргийн иргэдийн Төлөөлөгчдийн хурлын сонгуулийн тухай хуульд зааснаар орон нутгийн сунгаанд нэр дэвшичдийг энэ сарын 6-9-ний хооронд бүртгэсэн. Хуулийн хугацаанд нийслэлийн Сонгуулийн хороонд 60 нэр дэвшигч бүртгүүлж, үүнээс 58 нь нийслэлийн Аудитын газарт мөрийн хөтөлбөрөө хүргүүлжээ. Үлдсэн хоёр нь мөрийн хөтөлбөрөө хүргүүлэхээс татгалзсан байна.

НИТХ-ын өмнөх сунгаанд нийт 273 нэр дэвшигч өрсөлдсөнөөс АН-аас 45, МАН 45, Монгол Консерватив нам найм, Иргэний Хөдөлгөөний нам 41, МАХН 45, МУНН гурав, Бүгд найрамдах нам 21, ХҮН 25, Хөгжлийн Хөтөлбөр Нам таван хүн, 19 бие даагч нэрээ дэвшүүлж байжээ.

19 бие даагчаас хуульд заасан баримт бичгийн бүрдэл хангасан, сонгогчийн гарын үсгийн зөрчилгүй Баянзүрх дүүргийн 9 дүгээр тойргоос нэр дэвшигч Ө.Мөнхбат, тус дүүргийн 10 дугаар тойрогт нэр дэвшигч У.Даваажав, Чингэлтэй дүүргийн 42 дугаар тойрогт нэр дэвшсэн С.Энхбаяр, Налайх дүүргийн 45 дугаар тойрогт  нэр дэвшсэн А.Туяабаатар нарт мандат олгожээ.

Гэвч төрийн эрхийг ээлжилж атгалцдаг хоёр намаас өөр нэг ч намын төлөөлөл, бие даагч суудал авч чадаагүй юм. Иргэдийн өгсөн саналаар МАН 34 суудал авч олонх болж, АН 11 суудалтайгаар сөрөг хүчний үүргийг гүйцэтгэсэн.

Энэ удаад НИТХ-ын 23 тойрогт МАН 45 хүн, ХҮН 27, АН 37 хүнийг нэр дэвшүүлжээ. УИХ-ын сонгуульд унасан намуудын тухайд намын хамаг л өнгөтэй өөдтэйгөө шилж, шавхаж оролцуулж байна.

Ингэхдээ эрх баригч намын эсрэг АН, МАХН, ШИНЭН нар хүчээ хамжиж оролцох бөгөөд хэрэв НИТХ-д олонх болж сонгогдвол нийтийн тээврийг үнэгүй болгож, аж ахуйн нэгжүүдийн үйл ажиллагааг хэвийн гормд оруулахаа амласан юм.

Харин бие даагч 58 хүнээс хэдийнх нь мөрийн хөтөлбөр, бусад баримт бүрдүүлбэр тэнцэж мандат авах нь ирэх долоо хоногт тодорхой болно. Хэдий ёсзүйтэй, мэдлэгтэй хүн байлаа ч бие даагаад гарсан тохиол цөөн. Тиймээс нийслэлийн ч тэр дүүргийн ч тэр сонгуульд чамгүй өрсөлдөгч байхын тулд тун чиг нямбай байх шаардлагатайг бие даагч 58 хүнд сануулъя.

А.Сүх