“БҮТЭЭЛЧ МОНГОЛ” цувралдаа ИЗОУИС-н ДУДТС-н хувцас дизайны тэнхимийн Хувцас дизайнерын гуравдугаар курсийн оюутан Б.Наранчимэгийг онцолсон юм. Хүсэл мөрөөдлөөрөө жигүүрлэж, хийж бүтээхийн “амтанд” орж яваа тэрбээр цахим орчинд ВОNA”S HANDMADE page хуудсыг хөтлөн ажлуулдаг. Цахим хуудсаараа дамжуулан өөрийн урласан бүтээлээ худалдан борлуулахын хажуугаар хувцасны захиалга авч, оёсоор өдгөө дөрөв дөхь жилтэйгээ золгож байгаа аж.
Өөрийн оёсон бүтээлээрээ бусдыг гоёж оюутны ширээнээс орлогынхоо эх үүсвэртэй залгасан гэнэ.
Өөрийгөө хөгжүүлсэн үе
Тухайн үед Б.Наранчимэг сургууль сонгоогүй ч өөрийгөө хөгжүүлэх талд анхаарал хандуулж, хоёр жилийн хугацаанд оёдол эсгүүрийн болон загвар өмсөгчийн сургалтад явж, цагийг үр бүтээлтэй өнгөрүүлж эхэлжээ. Өглөө 8-12 хүртэл сургалтандаа сууж, өдөр нь ажилладаг байсан гэнэ. “Өөрийгөө хөгжүүлж, оёдлынхоо мэдлэгийг тэлэх зорилт тавин ажилласан. Дөрвөн жилийн өмнө охид бүсгүйчүүдийн дунд трэнд болж байсан мөр гардаг цамц, даашинзыг олон тоогоор оёж, хүргэлтээр явж зардаг байсан. Шөнөжин сууж, оёчихоод өглөө нь захиалгаар хүргэж өгөхөөр гарна. Замын түгжрэлээс эхлээд асуудлууд ар араасаа цувардаг байсан. Гэхдээ надад шантрах эрх байгаагүй. Мөрөөдлөө биелүүлэх гэж явж байгаа болохоор эрч хүчээр л дүүрэн байсан” гэв.
Нойроо хугаслан байж, шөнөжин сууж оёсон ч өглөө эртлэн босч захиалгаа хүргэж өгөхөөр гардаг тэрбээр урмын сайхан үг сонсч, урагшилсаар өдгөө өөрийн гэсэн олон үйлчлүүлэгчтэй болжээ. Сэтгэл зүтгэлээ шингээж, хөлс хүчээ дуслуулан байж оёсон даашинзаа эзэнд нь өгөхөөр утас цохиж, орцны гадаа олон цаг даарч зогсоод ч орлогогүй буцдаг үе бишгүйдээ байсныг энд онцлох нь зүйн хэрэг болов уу. “Тэглээ гээд би шантраагүй. Ажил хийж байгаа хүнд иймэрхүү зүйл тохиолдоно. Эерэгээр хүлээж аваад илүү ихийг сурах хэрэгтэй ” гэх түүний сэтгэлд өнөөдрийг биш ирээдүйн гэрэл гэгээтэй замынхаа зураглалыг хэдийнээ зурчихаад биелүүлхээр алхаж яваа оюутан охиноор бахархгүй байхын аргагүй.
Санхүүгийн сахиалга баттай хуримтлалтай оюутан
Эсгүүр гаргаад оёдол хийгээд сурчихсан болоод тэрүү мэргэжлийн дизайнерын төвшинд сэтгэж, үйлчлүүлэгчдийнхээ сэтгэлд тохирсон олон бүтээлийг урлахын тулд ИЗИС-ийн босгыг алхжээ. Нэг үгээр хэлэхэд практик дээр суурилсан мэдлэгээ онолд хавсаргах шаардлага тулгарчээ. Тэрбээр оюутан гээд аав ээжийнхээ халаасыг хоосолсонгүй. Харин ч сард 800-1000000 төгрөгийн орлого олж, хуримтлал үүсгээд багагүй хугацаа өнгөрчээ. “Би аав ээжээсээ санхүүгийн хувьд хараат бус байдаг. Мөнгө төгрөг аваад байдаггүй. Хэрэглээ болон байрныхаа мөнгийг өөрөө зохицуулдаг. Олсон орлогынхоо тодорхой хувийг хадгаламжиндаа хийж, өөрийгөө хөгжүүлэхэд зарцуулах зарчмыг баримталдаг” гэлээ.
Охиноо урамшуулж, оёдлын машин авч өгчээ
Урлаж шаглаж, оёдог хүний хамгийн чухал зэмсэг бол машин. Тэр тусмаа олон төрлийн оёдлын машин шаардагдхаас гадна үнэлгээ өндөр учир аав ээж нь охиныгоо урамшуулж, шулуун болон хэрээсний машин бусад дагалдах хэрэгслийг авч өгчээ. “Анх бол европ хувцсыг дагнаж, гоёл чимэглэлийг хослуулан хийдэг байсан. Дараа нь үндэсний дээл, цамцыг хийж эхэлсэн. Цагаан сараар ээждээ зориулж монгол дээл, аавдаа цамц хийгээд Ховд руу явуулсан гэлээ. “Эмзүйч бол” гэж шахаж шаарддаг байсан охиноос өөрийн гараар урласан монгол дээл, цамц явуулахад магнай нь хагартлаа баярлаж, сар шинээр бууж мордсон хүн бүрт “Миний охин оёж өгсөн” гэж бахархан ярих буурлууд охиныгоо чадварлаг дизайнер болно хэмээн сүүн цацал өргөж суугаа бизээ.
Аав ээжээсээ ерөөлийн сайхан үгс сонссон тэрбээр удахгүй өөрийн нэрийн хувцас загварын урлантай болж, хүмүүст чамин, чанартай загварлаг хувцсыг боломжийн үнээр оёж өгөхийг төлөвлөсөн байна. Одоохондоо орлого гэхээсээ илүү хүмүүст өөрийн бүтээлийг хүргэх зорилготой байгаа аж. “
Миссийн тэмцээнд оролцож шилдгээр шалгарчээ
Хийсэн бүтээлтэй хэлэх үгтэй Б.Наранчимэг миссийн тэмцээнд амжилттай оролцож, залуу насныхаа гоо үзэсгэлэнг мөнхлөн үлдээжээ. “ Хөдөөнөөс ирээд шууд л Шилмэл загвар агентлагт бүртгүүлээд явж эхэлсэн. Эмэгтэй хүүхэд бүр том болоод мисс болно л гэж ярьдаг. Би ч бас тэгж боддог байсан. Нэгдүгээр курсийн оюутан байхдаа миссийн тэмцээнд орж байлаа.
“Оюутан мисс-2018”-д оролцож шилдэг 14 охины нэгээр шалгарсан. Хүний залуу нас гоо үзэсгэлэн хязгаартай. Тиймээс гар урлал, хувцас загвар урлах ажилдаа анхаарал хандуулж эхэлсэн” гэв. Хөдөөгийн буйдхан суманд өссөн тэрбээр сэтгэл дотроо орон нутгаа хөгжүүлэх бодолтой явдаг байна. Ховд аймгийн Ховд сум хотоос хол байдаг болоод ч тэрүү хөгжлийн хувьд төдийлөн сайн биш. Тиймээс Б.Наранчимэг их сургуулиа төгсөөд сумандаа үндэсний үйлдвэрлэл эрхэлж боломжийн үнэтэй борлуулахыг зорьж байгаа аж.
Аливаа зүйлийг хийхэд олон давааг давж, амжилтанд хүрнэ. Алдаа оноо хэцүү үе ч бишгүйдээ тохиолдоно. Энэ бүхнийг ухааны цараар шийдэж, урагшлах ёстой. Гэрэл гэгээтэй ирээдүйн төлөө өмнөө тавьсан зорилгоо биелүүлэхийн тулд өдөр шөнийг ажралгүй хөдөлмөрлөж байгаа оюутан охины хүсэл тэмүүлэл, зорилгыг ямар нэгэн өнгө будаггүйгээр харуулсныг энд тодотгох хэрэгтэй.
С.Ичинхорлоо
