Шатахуун импортлогч компаниуд стратегийн ач холбогдолтой салбар гэсэн үгээр шалтаг хийн үе үеийн Засгийн газрыг шантаажилсаар ирсэн. “Ийм ч татвараа буулга, тийм ч татаас өг” гэнэ. Эс бөгөөс түлшнийхээ үнийг нэмнэ хэмээн зохиомол хомсдол үүсгэн төр, засаг болоод иргэдийг хөөрхөн чангалчихна.

Энэ бүхэнтэй тэмцдэг ганц газар нь ШӨХТГ. Тус байгууллагын үе үеийн удирдлагуудаас ШӨХТГ-ын дарга асан О.Магнай шатахууны үнийг 235-260 төгрөгөөр зохиомлоор нэмсэн "НИК", "Магнай трейд", "Сод Монгол групп", "Жаст Ойл", "Шунхлай трейдинг", "Ойн бирж", "Петро жамп", "М-Ойл групп"-т 17 тэрбум төгрөгийн торгууль тавьж, шуугиан тарьж байв.

Гэвч эрх ашгийг нь хөндсөн ШӨХТГ-ын дарга О.Магнайг удалгүй ажлаас нь чөлөөлж, шинэ дарга нь дээрх торгуулийг хүчингүй болгож, энэ хэрэг эцэстээ хэрхэн төгссөн нь тодорхойгүй үлдсэн байдаг.

Харин одоо шатахуун нийлүүлэгч компаниуд иргэдийн халаасыг тэмтрээд зогсохгүй эд хөрөнгөд нь халдаж эхлэв.

Тодруулбал, ШӨХТГ-аас шатахуун импортлогч компаниудад шатахууны чанарын шалгалт хийсэн талаараа өчигдөр мэдээллэж, Монгол Улсад хэрэглэж байгаа шатахуунд маргенз, хүнд металл, хүхэр илэрсэн гэлээ. Тухайлбал, "Тэс Петролуим" ХХК-ийн ШТС-7-ын дизель түлш болон АИ92 авто шатахууны хоёрдугаар савнаас бохирдол буюу ус илэрсэн.

"Шунхлай” ХХК-ийн ШТС-32 АИ95 авто шатахууны савнаас ус илэрсэн, лаг наалдсан байдалтай гарч ирсэн. Мөн "Синчи Ойл" ХХК-ийн ШТС-2-ын АИ92 авто шатахууны хоёрдугаар сав, “Петрожамп” ХХК-ийн ШТС-2-ын АИ92 авто бензиний савнаас тус тус ус илэрчээ.

Шатахуунд стандартаас бусад ус, механик бохирдол байх ёсгүй. Эсрэгээрээ хүнд металл, хүхрийн агууламж их байгаа нь авто тээврийн хэрэгслийн хөдөлгүүр гэмтэх, шаталтын хий нь хүний биед сөрөг нөлөө үзүүлэх сөрөг үр дагавартай.

Нөгөөтэйгүүр, манай улсад керосины хэрэглээ бараг байхгүй.

Жилдээ 150-300 тонныг л хэрэглэдэг. Гэтэл хилээр оруулж ирдэг их хэмжээний керосин хаашаа ордог нь тодорхойгүй байдаг аж. Үүгээр чанарын шаардлага хангахгүй түлш, шатахуун үйлдвэрлэж байх эрсдэлтэйг ч холбогдох албаныхан хэлж байгаа юм.

Бид идэж, уухаа хэмнэн байж хэдэн төгрөг цуглуулан хөл дүүжлэх унаатай болдог. Хүний л хэрэгцээ юм даа. Гэтэл хүнд металлтай, хүхрийн агууламж ихтэй шатахууныг шахаснаар автомашины зүрх болсон моторыг богино хугацаанд элэгдэлд оруулж, таг зогсоох эрсдэлтэй. Харин иргэд шатахуунаас бус эвдрэлтэй замыг буруутгадаг гэмтэй. Импортлогчид шатахууны зохиомол хомсдол үүсгэн иргэдийг чирэгдүүлнэ. Харин одоо эд хөрөнгөд нь шууд бусаар ил тодоор халдаж эхэллээ.

У.Гэрэл