Өчигдөр Дарханы замд дарга нар овоорч, тууз хайчилж сүржин нээлт хийлээ. Тууз хайчлах хэмжээний ямар нээлт болов. Арай мэдэгдэхгүйгээр замаа тавьчихсан, түүнийгээ нээж байгаа юм биш биз гэтэл хурд хэмжигч байршуулсан юм байж.

Хурд хэмжигч байршуулахад хүртэл тууз хайчилж байгаа улс “дуулиант” Дарханы замыг ашиглалтад оруулчихвал салют буудуулж, найр наадам хийж магадгүй л юм. Ийнхүү замгүй хурд хэмжигч өчигдрөөс ажиллаж эхэллээ.

Дарханы замыг Азийн хөгжлийн банкны 60 сая ам.долларын зээлийн санхүүжилтээр хийж буй.

Зам тээврийн хөгжлийн сайд асан Б.Энх-Амгалангийн хэлснээр эхний ээлжийн зам 2019 онд, нөгөө хоёр эгнээ нь энэ онд ашиглалтад орох байв.

Гэтэл эхний ээлжийн хоёр эгнээ ч үгүй жил дамналаа. Нөхцөл байдлыг ковид-той уялдуулан тайлбарлах байх. Гэхдээ эхний ээлжийн хоёр эгнээ зам ашиглалтад орох хугацаанд цар тахлын аюул нүүрлээгүй байсан шүү. Гэтэл замаа нээчихсэн юм шиг юун сүржин нээлт вэ. Тохуурхаад ч байгаа юм шиг. Ерөнхий сайдын хэлсэн шиг хэрэгтэй, хэрэггүй дарга нар хурд хэмжигч мэтийн нээлтэд салбаганаж суух тийм завтай хүмүүс үү. Ажлаа хий л дээ гэж хэлмээр. 

Дээрх нээлт нь орон нутгийн замд үйлдэгддэг хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг, зам тээврийн ослоос урьдчилан сэргийлэх, хэрэг ослоос үүдэлтэй нийгмийн хор уршгийг багасгах, авто замын хөдөлгөөнд оролцогчдын сахилга, хариуцлагыг дээшлүүлж, иргэд таатай зорчих нөхцөлийг бүрдүүлэх зорилгоор “Яараад яахав дээ” урьдчилан сэргийлэх арга хэмжээний хүрээнд хэрэгжиж байгаа юм байна. Орон нутгийн замд авто осол, аваар ихээр гарч байгаа нь үнэн. Үүнтэй эвлэрч л байгаа бол эхлээд замаа тавиад өгчих л дөө, дарга нар аа.

Б.Лхам