Орон нутгийн сонгуулийн санал хураалт сар гаруйхны дараа болно. УИХ-ын сонгуулиар улс даяар МАН ялсан бол Орон нутгийн сонгуулийн дүн эсрэгээрээ гарах магадлал харагдаж эхэллээ.

Учир нь энэ удаагийн Орон нутгийн сонгуульд МАН дангаараа АН болон бусад намууд эвсэж орж байна. Ингэж эвссэн нь мэдээж хүч өгнө. Түүнээс гадна МАН-ын нэр хүнд сайнгүй, хүч түрэмгийлсэн коммунист маягийн бодлого барих болсон гэх шүүмжлэлийг олон нийтийн зүгээс өгөх болсон.

Түүнээс гадна МАН-ын УИХ-ын сонгуульд ялсан нууцыг намын даргынх нь нэр хүндтэй холбоод байдаг. Өөрсдөө ч хэлдэг. УИХ-ын сонгуулиас өмнө МАН-ын дарга У.Хүрэлсүхийн нэр хүнд өндөр байсанд энэ намын сонгууль хариуцсан нөхдүүд дулдуйдаж сонгуулийн PR, стратегиа боловсруулсан гэдэг. Өөр нэг зүйл нь сонгуулийн луйвар явагдсан гэх өнцөг байдаг.

Харин сар гаруйн дараа дүн нь гарах Орон нутгийн сонгуульд МАН ялна гэсэн итгэл хаа хаанаа алга байгааг энд онцолъё.

МАН-ын дарга У.Хүрэлсүхийн нэр хүнд унасан. Сонгуулиас өмнө тааруухан байсан МАН-ын нэр хүнд ялсны дараа ч ахиж дэвшээгүй. Тэр ч байтугай сонгуулиас хойш У.Хүрэлсүх, түүнтэй ойрхон хэдхэн хүний мэдэлд бүх эрх ямба, хуваарилалт орсон нь МАН-ынхныг талцалд хүргэсэн.

МАН-ын зарим удирдлага Нийслэлийн МАН-ын дарга Д.Сумьяабазартай таагүй харилцаатай байгаа гэх мэдээлэл тараад байна. Товчхондоо, 2020 оны Орон нутгийн сонгуульд МАН Нийслэлийн МАН-аа дэмжихгүй гэсэн үг.

Наад захын ийм шалтгаанууд МАН-ын тухайд Орон нутгийн сонгуульд онхолдох үндэслэл болох вий.

Энэ мэтчилэн Орон нутгийн сонгуулийн дүн хаашаа ч эргэж мэдэх нөхцөл бүрджээ.

Сонгуулийн гол шийдлийг гаргаж байдаг хотод хамгийн ширүүн өрсөлдөөн болохоор байгаа юм. АН болон бусад намын эвсэл, МАН-ын аль нь нийслэлд ялахаас нэлээд зүйл хамаарна.

Нөгөөтэйгүүр чухал биш юм шиг атлаа НИТХ-ын сонгуулийн дүнд нөлөө үзүүлэх нэг зүйл нь ялсан нам, улс төрийн хүчин хэнийг Хотын дарга болгох вэ гэдэг юм. Энэ тухайд аль аль нь дотооддоо ярьж эхэлсэн. Хотын дарга болохоор яригдаж буй кандидат нь намынхаа, эвслийнхээ “туг” нь болох чадалтай байх ёстой гэсэн цензурыг АН болон бусад нам ч, МАН ч тавьж буй ажээ.

Одоогоор гол өрсөлдөгч хүчнүүдээс Хотын даргад тус бүр дөрвөн хүнийг нэрлэж болохоор байна.

МАН-ын хувьд Нийслэлийн МАН-ын дарга Д.Сумьяабазар УИХ-ын гишүүн учраас Хотын дарга болох боломжгүй. Хотын дарга болно гэвэл тэрээр УИХ-ын гишүүнээсээ татгалзах ёстой болно. Энэ бараг боломжгүй. Тиймээс ч МАН ялбал Хотын дарга болох хүмүүсээр одоогийн Хотын даргын үүрэг гүйцэтгэгч Ж.Батбаясгалан, НИТХ-ын дарга Р.Дагва, НМХГ-ын дарга Л.Эрдэнэчулуун, МАН-ын генсек Д.Амарбаясгалан нар яригдаж байна. Харин АН-ын тухайд Нийслэлийн АН-ын дарга Д.Пүрэвдаваа, “Улаанбаатар смарт карт” ХХК-ийн ТУЗ-ийн дарга Б.Мөнхболор, УИХ-ын гишүүн асан Ц.Оюунгэрэл, НИТХ дахь АН-ын бүлгийн ахлагч Ц.Баатархүү нарын нэр дуулдаж байна.

Ерөнхийдөө эдгээр найман хүний нэг нь Хотын дарга болно гэсэн үг.

Гэхдээ нэг “аюул” бий. Ерөнхий сайд У.Хүрэлсүх Хотын даргыг томилох хуультай. Сүүлийн үед, УИХ-ын сонгуулиас хойш Ерөнхий сайдын томилгоо тун хачирхалтай, сонин болоод байгааг намынхан нь гайхдаг болсон. Тиймээс Ерөнхий сайд хаанаас ч, хэнийг ч гаргаж ирээд Хотын дарга болгож мэднэ. Өөрөөр хэлбэл, Ерөнхий сайд хэнийг “таална” вэ, тэр хүн Хотын дарга болно гэсэн үг.

Эх сурвалж: Өдрийн сонин