Ойрын өдрүүдэд цагдаагийн байгууллагын нэр хүндтэй холбоотой мэдээлэл олон нийтийн дунд хөвөрч, нэлээдгүй шүүмжлэл дагуулаад байгаа билээ.

Тодруулбал , БНХАУ-ын Гадаад хэргийн сайд Ван И манай улсад айлчлах үеэр Гадаад хэргийн яамны өмнө болсон жагсаал цуглааны бичлэгийг хийж байсан иргэн цагдаагийн алба хаагчийн шаардлагыг биелүүлэхээс татгалзаж, шууд бичлэг хийж цацсан нь олон нийтийн сүлжээнд "гал асаасан" билээ.

Тухайн үйл явдлыг /цагдаагийн алба хаагч бичлэг хийж байсан иргэнийг шалгах шаарлага тавьсаныг эсэргүүцэж, бичлэг хийсэн/ зөвтгөх нэгэн байхад, эсэргүүцэх хүн ч цөөнгүй байсан юм.

Б.БААТАРХҮҮ: ЦАГДААГИЙН АЛБА ХААГЧ ИРГЭНИЙ БИЧИГ БАРИМТЫГ ШАЛГАХ ЭРХТЭЙ

Тэгвэл эл асуудлаар ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүү "ГХЯ бол төрийн тусгай хамгаалалтад багтсан байгууллага. Тиймээс сэжиг бүхий этгээдийг цагдаагийн алба хаагчид шалгахаар шаардлага тавьсан юм билээ. Цагдаагийн албаны тухай хуулийн 23-р зүйлд заасанчлан “Цагдаагийн алба хаагч, хуулийн этгээд нь гэмт хэрэг, нөхцөлөөс урьдчилан сэргийлэх, таслан зогсоох, зөрчлийг арилгуулах, учирч болох хор хохирлыг гаргуулахгүй түүнийг нэмэгдүүлэхгүй байх зорилгоор хүн, хуулийн этгээдэд тодорхой үйлээс татгалзах эсхүл үйлдэл хийх шаардлага тавих” эрхтэй байдаг. Мөн хуулийн 25-р зүйлд зааснаар “Хүний нэр хаяг, тодорхой үйл ажиллагааг тодруулах зорилгоор бичиг баримтыг нь шалгах” эрхтэй. Харин тухайн үед иргэнд шаардлага тавьсан цагдаагийн алба хаагчийг иргэнтэй ямар байдлаар харилцсан түүнийг нь бол шалгах болно" гэдгийг мэдээлжээ. 

Б.СҮНДЭРЪЯАГИЙН ЭЭЖИЙГ ХАМТРАН АМЬДРАГЧ НЬ ГЭМТЭЭЖЭЭ

Түүнчлэн олон нийтийн дунд Сүүнээ нэрээр танигдсан балетийн багш Б.Сүндэръяа "Улаан бал” нэвтрүүлгийн үеэр цагдаагийн байгууллагатай холбоотой хэд хэдэн хэрэгт шалгалтын ажиллагаа хийгдэхгүй байгаа талаар мэдээлсэн нь мөн л олны анхаарлыг татаад байсан юм.  Тэгвэл эх сурвалжийн мэдээлж буйгаар Сүндэръяагийн ээж А-ын хамтран амьдрагч Т нь хувийн таарамжгүй харилцааны улмаас биед нь гэмтэл учруулсан асуудлыг шалгаж дууссан бөгөөд уг хэргийн шүүх хурал энэ сарын 24-ны өдөр болох аж.  Ямартай ч дээрх асуудлуудад албаны хүн ийнхүү байр сууриа илэрхийлжээ. 

Б.Батчимэг