Өвөлжилтийн бэлтгэл ажлын хүрээнд хадлан бэлтгэх ажил ямар явцтай байгаа талаар ХХААХҮЯ-ны Мал аж ахуйн бодлогын хэрэгжилтийн зохицуулах газрын мэргэжилтэн Б.Төгс-Эрдэнээс тодрууллаа.

-Энэ өвөл их хүйтэрнэ гэж мэргэжилтнүүд хэлж байна. Өвөлжилтийн бэлтгэл хэр хангагдаж байна. Хадлан бэлтгэх ажил улсын хэмжээнд хэдэн хувьтай явж байна вэ?

- Өвөлжилтийн бэлтгэл ажил хангах хүрээнд шадар сайд бүх аймгуудад ажилласан. Үүнтэй холбогдуулаад хадлан бэлтгэлийг аравдугаар сарын 1-ний дотор бэлтгэж дуусгах чиглэлийг өгсөн. Энэ жил хадлан бэлтгэлийн ажил хур бороо ихтэй байсны улмаас харьцангуй орой эхэлсэн. Одоогийн байдлаар улсын хэмжээнд хадлан бэлтгэх ажил 10 гаруй хувьтай явж байна.

-Хадлан тэжээлийн голлох нөөцийг хаанаас бэлтгэж байна?

-Хадлангийн гол бүс нутаг нь зүүн аймгуудаас бэлтгэдэг. Манай улс нийтдээ 1.7 сая га хадлангийн талбайтай. Үүний 71 хувь нь Дорнод, Хэнтий, Сүхбаатар аймагт байдаг. 40 гаруй хувь нь зөвхөн Дорнод аймагт байгаа. Эдгээр аймгуудаас голлох нөөцийг бэлтгэж байгаа.

-Өнгөрсөн жилийн хувьд хэдэн тонн хадлан бэлтгэж байв. Энэ жилийн хувьд хэдэн тонн өвс бэлтгэх төлөвтэй байна вэ?

-1960 онд хадлан бэлтгэлийн оргил үед 1.5 сая тонн өвс бэлдэж байсан. Үүнээс хойш хадлан бэлтгэл энэ хэмжээнд хүрээгүй. Гэхдээ 2010 оноос хойш бид нэг сая тонноос дээш хадлан авч байгаа. Өнгөрсөн онд 1.3 сая тонн хадлан бэлтгэсэн. Харин энэ жилийн хувьд 1.1 сая тонноос дээш хадлан бэлтгэх төлөвлөгөөтэй байна. Хадлан бэлтгэлийн хамгийн өндөр хувьтай явж байгаа аймаг нь өнөөдрийн байдлаар Баян-Өлгий аймаг буюу 50 гаруй мянган тонн өвс бэлтгэсэн байна.

А.Сүх