Баянзүрх дүүргийн 13 дугаар хорооны Засаг дарга О.Ариунболдтоай ярилцлаа.

-Баянзүрх дүүргийн 13 дугаар хорооны Засаг даргаар хэдий хугацаанд ажиллаж байна? Танай хороонд  ямар асуудлууд хамгийн ихээр тулгамддаг вэ?

-Миний хувьд Баянзүрх дүүргийн 13 дугаар хорооны Засаг даргаар ажиллаад 1 жил гаруй хугацаа өнгөрч байна. Хорооны Засаг даргаар томилогдохдоо хороонд тулгамддаг асуудлуудыг мэддэг байсан учраас ажлаа авсан өдрөөсөө л асуудлуудыг шийдэхээр яарсан даа. Манай 13 дугаар хороо Баянзүрх дүүрэг, Нарантуул захын дунд оршдог нам дор газартай учраас үерийн ус их орж ирдэг, үүнээс болоод гудамж талбай усанд автаж, шавар шалбааг ихтэй, явган хүн явахын эцэсгүй байсан. Тиймээс “Дэлхийн зөн” байгууллагын туслалцаатайгаар 16 нарийн гудамжыг явган хүний засмал замтай болгосон. Түүнчлэн иргэдтэйгээ хамтраад 5 гудамжийг хусаж, тэгшлээд, 4 гудамжид гэрэлтүүлэг тавьсан байна.

-13 дугаар хороо хичнээн хүн амтай бэ? Цэцэрлэг, сургуулийн хүрэлцээ хангамж хэр байдаг уу?

-Манай хороо 3125 өрхийн 14200 орчим иргэдтэй. Үүнээс 18 хүртэлх насны 4274 хүүхэд амьдарч байна. Хорооны харьяанд ерөнхий боловсролын 14, 55 дугаар дунд сургуулиуд, 172 дугаар цэцэрлэг үйл ажиллагаа явуулдаг. Цэцэрлэг, сургуулийн хүрэлцээ бусад хороодтой харьцуулахад гайгүй боловч бүрэн хамрагдаж чадахгүй л байна. Эдгээр хүүхэд багачуудынхаа аюулгүй, сайхан орчинд амьдрах боломжийг бүрдүүлэхийн төлөө хичээж ажилладаг. Саяхан л гэхэд сурагчдын сургуульдаа ирж, очдог гол зам болсон  14 дүгээр сургуулиас уруудсан нарийн гудамжинд байрлах 10 мянган вольтын өндөр хүчдэлийн шонгийн цахилгааны утас борооны усанд ил гарчихсан байсныг гудамжийг нь бүрэн цутгамал болгож, аюулгүй болгосон. Ер нь би 7 хоногтоо 2-3 удаа хороогоо бүтэн тойрч, иргэдтэйгээ санал солилцож, иргэдэд тулгарсан асуудлыг хамтдаа шийдвэрлэхийг зорьдог.

-Хороо өөрийн гэсэн төсөв, хөрөнгөгүй байгууллага гэдгийг бүгд мэднэ. Энэ нөхцөлд дээрх ажлуудаа хэрхэн яаж шийдвэрлэсэн туршлагаа хуваалцаач. 

-Тийм шүү. Иргэд асуудлаа яриад ороод ирэхэд нь хороонд төсөв, мөнгө алгаа гээд суухыг хүсээгүй. Тиймээс албан тасалгаанд сууж ажилладаг хорооы Засаг дарга нарын хэвшмэл байдлыг эвдэхийг хүссэн учраас иргэдтэйгээ өдөр тутам уулзаж, хаана ямар зам харгуй эвдэрч, аль гудамжны гэрэл асахгүй байна гээд л гүйдэг дээ. Мөн хорооныхоо иргэдийн дунд бүлэг байгуулан ажиллаж, иргэд гудамж, гудамжаараа нэгдэн хамтдаа амьдрах орчныхоо тохижилтийг хийдэг. Ингэснээр иргэдийн дундах хөршийн холбоо ч сайжирч байгаа нь анзаарагддаг.

Иргэдийн дунд хороо хорин, засаг дарга маань ажил хийхгүй байна гэсэн шүүмжлэл их байдаг. Харин та залуу хүн гэхэд иргэдтэйгээ нягт хамтарч ажилладаг тань таатай сонсогдож байна? Би хүүхэд байхдаа хорооны засаг дарга болно гэж боддог байлаа. Яагаад гэвэл бага байхад миний амьдардаг орчин асуудал ихтэй, хүмүүсийн ярих нь нөгөө хороон дарга л юм хийхгүй байна гэсэн үг сонсогддог байсан. Тиймээс хүүхэд байхаасаа хороон дарга хүмүүсийн амьдрах орчныг гоё болгодог хүн юм байна, ажлаа сайн хийдэг хороон дарга болноо гэж боддог байлаа. Нэгэнт хүүхэд насны бодол биелсэн хүн чинь зүтгээд байя гэж боддогдоо. Иргэдтэйгээ байнгын харилцаатай байх үүднээс хорооныхоо фэйсбүүк хуудсыг идэвхтэй хөтөлж, хийж буй ажлынхаа явцыг тайлагнасаар “Лайвчин” болоод байна. Хорооны фэйсбүүк хуудсаар иргэд маань надад бас “хов зөөнөө”. Саяхан л гэхэд 125 дугаар байрны өмнөх засмал зам үерийн усанд урсаад, хүн машин явах аргагүй болсон. Зам тавьсан компанийн нөхдүүдийг араас нь хөөцөлдсөөр байгаад замыг нь дахин тавиулсан.

- Хороонд тулгамдаж буй нэг асуудал хог байдаг шүү дээ. Энэ талаар?

-Яах аргагүй үнэн. Манай хорооны хогийг дүүргийн нийтлэг үйлчилгээний газар 2-оос ачиж тээвэрлэдэг. Гэр хорооллын өрхүүдийн хогноос гадна сүүлийн үед шинээр ашиглалтад орж байгаа байрнууд ихэвчлэн хогийн бункергүй, гадна талдаа ил задгай хогийн цэгтэй байдаг нь иргэдийн бухимдлыг төрүүлдэг. Тиймээс бид шинээр 4 хогийн цэг байгуулж, ядаж хог тээврийн машин иртэл ил задгай хог үүсэхээс сэргийлж ажиллаж байна.

-Танай хороо хичнээн аж ахуйн нэгж байгууллагатай вэ? Тэдэнтэйгээ хэр хамтарч ажилладаг бол?

-Манай хорооны нутаг дэвсгэрт 100 гаруй аж ахуйн нэгж үйл ажиллагаа явуулдаг. Мэдээж эдгээр байгууллагуудаасаа тусламж гуйхад хэзээд найрсаг хүлээж авдаг ч, хаашдаа ашгийн төлөө ажиллаж байгаа байгууллагуудаар байнга туслуулаад байж болохгүй гэж боддог. Гэхдээ олон улсын төсөл хөтөлбөрүүдийг хорооны иргэдтэйгээ холбоод өгчих юмсан гэж хичээж ажилладаг. Энэ жил гэхэд Дэлхийн зөн олон улсын байгууллагаас хорооны 5 өрхөд гэр олгуулах хүсэлтийг маань хүлээн авч, шийдвэрлэсэнд талархаж байна.

-Цаашдаа хороондоо хийж хэрэгжүүлэхээр зорьж яваа ажлаасаа дурлаач.

-Манай хороо нийслэлийн дахин төлөвлөлтөд орох гэж байгаа ч харамсалтай нь удаашралтай байна. Гэхдээ дахин төлөвлөлтийг хүлээлгүй хороогоо цэвэр, сайхан болгохын тулд хэд хэдэн ажил төлөвлөөд байна. Эхний ээлжинд хороо маань газар зүйн байршлын хувьд нам дор учраас үерийн ус их орж ирдэг. Тиймээс хамгийн түрүүн ус зайлуулах шугам, шуудууг нэмэгдүүлэхийг зорьж байна. Энэ маань ажил болчихвол гудамжууд усанд автаад, шавар шалбаагаар дүүрдэг нь багасна. Түүнчлэн гудамж бүртээ явган хүний засмал зам, хүүхдийн тоглоомын талбайтай, бүрэн гэрэлтүүлэгтэй хороо болгоно.

-Ярилцсанд баярлалаа.