Үндэсний бөхийн салбар хорооноос допингийн шинжилгээний хариуны талаар мэдээлэл хийлээ.

Улсын их баяр наадамд шөвгөрсөн 16 бөхөөс додингийн шинжилгээ авсан. Шинжилгээг БНСУ-ын допингийн хяналтын лабораторид илгээдэг. Хариу өнгөрсөн есдүгээр сарын 8-нд ирсэн. Шинжилгээгээр гурван бөхөөс допинг илэрсэн талаар бид өмнө нь мэдээлж байсан.

Тэгвэл Үндэсний бөхийн салбар хорооноос дээрх бөхчүүдийн нэрийг албан ёсоор зарлалаа. Тодруулбал, Хүчит бөхийн барилдаанд зургаа даван шөвгөрсөн Улсын харцага Б.Бат-Оршихын 4407678 дугаартай дээжид дэлхийн допингийн эсрэг хориглосон жагсаалт S1, S4, S5 бүлгийн гурван бодис илэрчээ.

Мөн улсын баяр наадамд найм давж, үзүүрлэсэн Улсын аварга Н.Батсуурийн 4406049 дугаартай дээжид S4 бүлгийн бодис илэрсэн бол зургаа давж шөвгөрсөн Улсын арслан Р.Пүрэвдавгын 4407679 дээжид гурван төрлийн бодис тус тус илэрчээ.

Допинг илэрсэн бөхчүүд эхний шатны шинжилгээний хариуг хүлээн зөвшөөрчээ. Допинг илэрсэн бөхийн барилдах эрхийг хоёр хүртэлх жилээр хасаж, цол чимгийг хасдаг журамтай. Одоо Үндэсний бөхийн салбар хороо хуралдаж саналаа Үндэсний их баяр наадмын хороонд хүргүүлэх аж.  Одоогоор дээрх гурван бөхөд ямар арга хэмжээ авах нь тодорхойгүй байна.

А.Сүх