Нийгмийн бодлогын байнгын хороо Эрүүл мэндийн даатгалын Үндэсний зөвлөлийн зарим гишүүдийг томилох, чөлөөлөх тухай УИХ-ын тогтоолын төслийг хэлэлцлээ.
Засгийн газар шинээр эмхлэгдэн байгуулагдсантай холбогдуулан Эрүүл мэндийн даатгалын Үндэсний зөвлөлд Засгийн газрын төлөөлөх гишүүдийг Засгийн газрын хуралдаанаар хэлэлцэж шийдвэрээ байнгын хороонд хүргүүлжээ.
Хуралдаанд оролцсон гишүүдийн олонхийн саналаар УИХ-ын гишүүн С.Чинзориг, Д.Сарангэрэл нарыг Засгийн газрыг төлөөлсөн Эрүүл мэндийн даатгалын Үндэсний зөвлөлийн гишүүнээс чөлөөлж, ХНХ-ын сайд А.Ариунзаяа, Эрүүл мэндийн сайд Т.Мөнхсайхан нарыг томилохыг дэмжлээ.
Байнгын хорооны уг тогтоолын төслийг УИХ-аар хэлэлцүүлэх юм. Энэ үеэр гишүүдийн хэлсэн үгийг онцлон хүргэе.
С.Чинзориг: Эрүүл мэнийн даатгалын үндэсний зөвлөлийг сайд нарын түдшинд байлгах уу гэдгийг анхаарах хэрэгтэй. Сайд нар зөвлөлийн асуудалд оролцох оролцоо нь бага байдаг. Ашиг сонирхлын зөрчилтэй асуудал үүсээд байгаа юм. Тухайлбал, Нийгмийн даатгалын Үндэсний зөвлөлийн сайд нь зөвлөлтэйгөө зөвшилцөж НДЕГ-ын даргыг томилдог хуультай. Гэтэл Үндэсний зөвлөлөө сайд нь өөрөө ахалчихаар өөртэйгөө зөвшилцөөд байгаа юм шиг асуудал гараад байна. Тиймээс сайд гэхгүйгээр төрийн нарийнуудыг оролцуулаад явбал яасан юм гэсэн санал байна.
Д.Сарангэрэл: Засгийн газрын бүтэц бүрэлдэхүүн өөрчлөгдсөнтэй холбогдуулан Нийгмийн даатгалын болон Эрүүл мэндийн даатгалын төрийг төлөөлсөн гишүүд солигддог. Засгийн газар бүрэлдсэнээс хойш гурван сарын хугацаа өнгөрлөө. Энэ хугацаанд Эрүүл мэндийн даатгалын Үндэсний зөвлөлийн бодлого шийдвэр цаг алдаж байна. Тиймээс С.Чинзориг гишүүний хэлсэн саналын талаар цаашид хэлэлцэх нь зүйтэй.
Б.Лхам
