Хан-Уул дүүргийн 12 дугаар хорооны иргэн М.Мандах тус дүүргийн ИТХ-ын дарга Б.Цэрэн,  Засаг дарга Ж.Алдаржавхлан нарыг шалгуулах хүсэлтэй байгаагаа илэрхийллээ. 

Тэрбээр "Би Хан-Уул дүүргийн 12-р хороонд амьдардаг. Засаг дарга Ж.Алдаржавхлан, ИТХ-ын дарга Б.Цэрэн нарыг АТГ-т шалгуулах хүсэлтэй байгаа ард иргэдийнхээ төлөөлөл болж ирлээ. Эдгээр хүмүүстэй холбоотой зургаан асуудал байна. Олон сая төгрөгийг гурван компаниас авсан. Үүнд гурван тэрбум 198 сая төгрөг өгсөн юм. Эдгээр компанид гэр бүлийн гурван хүний эзэмшилд бий. н.Чулуунсүх, н.Уранчимэг, н.Анхжин гэх гурван хүн. Дараагаар нь орон нутгаас өгсөн буцалтгүй тусламж гэж бий. Ж.Алдаржавхлан 415 сая төгрөг гаргасан. Б.Цэрэн нь 919 сая төгрөгийг буцалтгүй тусламж. Ядарсан айлд өгөх туслах мөнгийг өөрсдөө хувааж аван, хүрэх ёстой хүмүүстээ очихгүй байна. Үүнийг шалгаж өгөөч.

Гадаадад томилолтын зардал гэж нийт 276 сая, иргэдийн төлөөлөгчдийн хурал нь 341 сая төгрөг. Энэ нь 2017-2020 оны хоорондох хугацаанд цугларсан.  Дараагаар нь газар олголттой холбоотой. Бид 0,7 га газраа авч чадахгүй байна. Тэгэхэд Ж.Алдаржавхлан 2020 оны дөрөвдүгээр сарын 10 өдрийн захирамжаар 40 га газрын өөрийн ойр тойрны хүмүүстээ өгсөн. 142 иргэнд хууль бус газар олголт хийсэн.

Үндэслэлгүйгээр 33 хүнийг ажлаас чөлөөлсөн. Үүнээс 17 иргэнийг буцааж ажилд нь аваагүй. Авлаа гэж хэлээд буцаагаад халдаг. Манай дүүрэгт дэвшсэн Анхбаяр гэдэг төлөөлөгч дөрвөн жилийн хугацаанд 54 удаа гадаад улс руу явсан. Одоо ахиад сонгогдох гээд байгаа. Бид хүлээж авмааргүй байна. авилгатай тэмцэх газар материал өгөхөөр ирсэн. Үүнийг шалгаж хариу өгөөч гэж зорьж ирлээ. Энд миний ярьж байгаа зүйлийн баримтууд юм" гэв.