Монголын төрөөс халамжийн чиглэлээр 72 төрлийн үйлчилгээ үзүүлдэг. Жилд 800 мянга гаруй иргэн төрийн хишиг хүртдэг нь бараг дөрвөн хүн тутмын нэг нь халамж авч байна гэсэн үг юм. Өнгөрсөн онд гэхэд л халамжийн үйлчилгээнд 670 гаруй тэрбумыг зарцуулжээ.

Улсаас үзүүлдэг 72 төрлийн нийгмийн халамжид хүүхдийн мөнгө, цалинтай ээж хөтөлбөр, халамжийн тэтгэвэр, хүнс тэжээлийн тусламж дэмжлэг, нөхцөлт мөнгөн тусламж, “Алдарт эх”-чүүдэд олгох мөнгөн тэтгэмж, амьжиргааг дэмжих мөнгөн тэтгэмж, ахмад настнуудад үзүүлэх хөнгөлөлт, “Насны хишиг”, жирэмсэн болон хөхүүл эхийн тэтгэмж, хөгжлийн бэрхшээлтэй иргэний болон ахмад дайчин, алдар цолтой ахмад настны тэтгэмж зэрэг ордог байна.

Гэтэл Монгол Улсын нэг иргэн энэ бүх халамж, тэтгэмжийг бүгдийг авдаг байна. Эр, эм, хөгшин, залуу  хэнбугай нь ч байсан алдарт эхийн, хөхүүл эхийн, хөгжлийн бэрхшээлтэй иргэний, ахмад дайчны бүр хөхүүл болон жирэмсэн эхийн, нэн ядуу өрхөд олгодог хүнсний талон гэх мэт бүх халамжийг хамж, сардаа 1.5 сая төгрөгийг зүгээр аваад сууж байдаг гэвэл та итгэх үү. Хэн гэгч арын хаалгатай нэгэн төрийн бүх л халамжийг түүж суудгийг холбогдох албаныхан шалгаж тодруулах биз ээ.

Нөгөөтэйгүүр, Эдийн засагч, нийтлэлч, “Дефакто” нэвтрүүлгийн хөтлөгч Д.Жаргалсайхан өөрийн твиттертээ энэ тухай баримттай жиргэсэн нь бас нэгэн нотолгоо юм.  

Халамж хүртэгсдийн дотор эрүүл саруул, эрхтэн бүтэн хөдөлмөрийн насны залуус, чинээлэг амьдралтай иргэд ч багтдаг гэх шүүмжлэл тасардаггүй. Бодит орлогоо нуудаг, төрийн албанд ажилладаг танил талаа ашигладаг, хамаатан саднаа халамж, тэтгэмжид “хавчуулдаг” зэргээс болж халамжийн үйлчилгээ зорилтот бүлэгтээ хүрч чаддаггүй гэдэг. Харин Хөдөлмөр нийгмийн хамгааллын яамнаас “Халамжийн үйлчилгээ хавтгайраагүй, зорилтот бүлэгтээ хүрч байгаа”. Үнэхээр зориулалтын бусаар ашиглаж байгаа бол манай яаманд баримттайгаар мэдээлэл өгч болно. Энэ дагуу бид шалгана гэлээ.

Хөдөлмөр нийгмийн хамгааллын яамнаас нийгмийн халамжийн бодлогод өөрчлөлт оруулж, Нийгмийн хамгааллын тухай хуульд шинэчилсэн найруулга хийхээр болсон байна. Хуулийн төсөлд зарим тэтгэвэр тэтгэмжийг нэгтгэх, зогсоох гэх мэт таналт хийх ба энэ нь халамжийн үйлчилгээг зорилтот бүлэгт хүргэх зорилготой аж. Энэ үеэр дээр дурдсанчлан хуулиас гадуур амьдарч, эзэндээ хүрэх ёстой халамжийг дундаас зувчуулж суугаа завшигчдыг илрүүлнэ гэж найдъя.

У.Тэргэл