Төрийн ордон эл хуль болжээ. Өнөөдөр орон нутгийн сонгуулийн сурталчилгааны сүүлийн өдөр. Төрийн ордон эзгүйрсэн нь гишүүд үүрэгт ажлаа "огоорон" тойрогт нэр дэвшигчдээ дэмжин ажиллаж яваатай холбоотой бололтой. Өнгөрсөн чуулганы хуралдааны үеэр УИХ-ын гишүүн Н.Алтанхуяг “Гишүүд сонгуульдаад орон нутгаар тэнэж явна. Ажлаа хий гэж хэл” гэж шүүмжилснээс нь үзэхэд ч тэр.

Ийн хэлэх болсны шалтгаан нь өнөөдөр УИХ-ын Нийгмийн бодлогын байнгын хороо, Байгаль орчин, хүнс, хөдөө аж ахуйн байнгын хороо өнөөдөр хуралдах товтой байсан ч гишүүдийн ирц хүрээгүй шалтгаанаар хуралдаж чадсангүй.

Хууль батлах, санаачлах нь гишүүдийн хийх үндсэн ажил. Хуваарьт ёсоор Нийгмийн бодлогын байнгын хороо Эрүүл мэндийн даатгалын үйл ажиллагаа, Байгаль орчин, хүнс, хөдөө аж ахуйн байнгын хороо мах бэлтгэл, үйлдвэрлэлтэй холбоотой асуудлаар хуралдах байв. Монгол Улсын Их Хурлын тухай хуулийн 25.2.Байнгын хорооны нийт гишүүний олонх хүрэлцэн ирсэн бол хуралдааныг хүчинтэйд тооцно гэж заасан. Өөрөөр хэлбэл, 15 гишүүний бүрэлдэхүүнтэй байнгын хороо найман гишүүн нь хуралд суухад ирц бүрдэнэ гэж үзнэ. Ядаж энэ тоонд ч хүрсэнгүй.

Тодруулбал, Нийгмийн бодлогын байнгын хороонд Ж.Батжаргал, Д.Батлут, Б.Бейсен, Х.Булгантуяа, С.Ганбаатар, Б.Жаргалмаа, Ц.Мөнх-Оргил, Г.Мөнхцэцэг, М.Оюунчимэг, ЦСандаг-Очир, Д.Сарангэрэл, Б.Саранчимэг, Ц.Туваан, Ч.Ундрам, Ц.Цэрэнпунцаг, Ж.Чинбүрэн, С.Чинзориг, Л.Энх-Амгалан нар багтдаг. Харин Байгаль орчин, хүнс, хөдөө аж ахуйн байнгын хороонд Ц.Анандбазар, Т.Аубакар, Б.Бат-Эрдэнэ, Ж.Бат-Эрдэнэ, Б.Баярсайхан, Б.Бейсен, Х.Болорчулуун, Г.Ганболд, Н.Ганибал, Г.Дамдинням, Г.Мөнхцэцэг, Н.Наранбаатар, Д.Өнөрболор, Б.Саранчимэг, Г.Тэмүүлэн, Ц.Туваан, О.Цогтгэрэл, Ц.Цэрэнпунцаг, Ж.Чинбүрэн нар харьяалагддаг.

УИХ-ын дарга аа, танхимын гишүүд чинь хаана явна вэ. Төрийн үйл ажиллагаа энэ мэтээр цалгардаад буй юм биш биз.

Тус хуулийн 23.1-д Байнгын хороо эрхлэх асуудлынхаа хүрээнд хууль санаачлагчаас өргөн мэдүүлсэн хууль, Улсын Их Хурлын бусад шийдвэрийн төслийг урьдчилан хэлэлцэж санал, дүгнэлт гарган нэгдсэн хуралдаанд хэлэлцүүлэх, Улсын Их Хурлын хяналтыг хэрэгжүүлэх, хуульд тусгайлан заасан асуудлаар Улсын Их Хурлын тогтоолын төсөл боловсруулах чиг үүрэгтэйгээр ажиллана гэж заасан. Тэгвэл цаг тухайд нь хэлэлцэж шийдвэр гаргаагүйгээс дээрх хоёр асуудлын УИХ-аар хэлэлцүүлэх хугацаа хойшлох нь.

Гишүүдийн ирц хүрээгүй шалтгаанаар байнгын хороодын хурал хойшлох нь олон. Ер нь бидэнд байдаг хүндрэл, сурах ёстой зүйл бол цагийг юм цагтаа гэдэг зарчим. Гишүүд орон нутгийн сонгуульд улайрч үндсэн ажлаа мартсан уу гэхээр Төрийн ордон эл хуль байна.

А.Сүх