Нийслэлд МАН үнэмлэхүй ялалт байгууллаа. Нийслэлийн МАН-ын дарга Д.Сумъяабазарын хувьд нийслэлд ялалт байгуулж, олонх болгож чадсан учраас бардам байгаа. Хотын дарга хэн болох вэ гэсэн сунгаа МАН дотор ид өрнөж, дотооддоо бужигнаантай байгаа ч гол хөзөр Д.Сумъяабазарын гарт бий.

Өнөөдрийн байдлаар НИТХ-ын төлөөлөгч Р.Дагва, Зам тээврийн асуудал хариуцсан төслүүдийн удирдагч, Нийслэлийн Засаг даргын нэгдүгээр орлогч Ж.Батбаясгалан, НИТХ-ын төлөөлөгч Ж.Алдаржавхлан, нийслэлийн МАН-ын дэд дарга Н.Алтаншагай, Нийслэлийн Засаг даргын инноваци, технологийн асуудал хариуцсан төслүүдийн удирдагч М.Халиунбат нарын нэрс дуулдаж байна. Ямартай ч, Хотын даргын түр орлон гүйцэтгэгч Ж.Батбаясгаланг үргэлжлүүлэн ажиллуулахгүй гэсэн тохиролцоонд хүрчээ.

Нийслэлийн МАН-ын дарга Д.Сумъяабазарын хувьд НИТХ-ын даргад Р.Дагвыг, Хотын даргад Н.Алтаншагайг томилуулахаар зүтгүүлж буй гэсэн мэдээлэл байна. Дээрх эрхмүүдээс хамгийн магадлалтай нь энэ хоёр гэдгийг ч эх сурвалжууд хэлж буй юм.

МАН-ын даргын хувьд эх орон, хөгжлийн төлөө ажиллах сэтгэл зүтгэлтэй, өндөр ёс суртахуунтай, ажлын дадлага туршлагатай байхаас гадна Монгол Улсын Засгийн газрын “Алсын хараа 2050” хөтөлбөрийг далайцтай хэрэгжүүлж чадах, багаар ажиллах чадварыг нь суурь шалгуур болгоно.

Энэхүү шалгуур хангасан хүнийг Хотын даргад нэрийг нь дэвшүүлж, олонд нээлттэй зарлана гэдгээ мэдэгдсэн. Хамгийн сонирхолтой нь, дээрх эрхмүүдийн нэрс дундуур Улаанбаатар хотын захирагчид НМХГ-ын дарга Л.Эрдэнэчулууны нэр ч орж ирж байна. Хотын захирагчид анх удаа эмэгтэй хүний нэр дуулдаж буй нь энэ юм.

У.Тэргэл