УИХ дахь Нийгмийн бодлогын байнгын хорооны хуралдаанаар Эм, эмнэлгийн хэрэгслийн тухай хуулийн төслийг хэлэлцсэн.

Энэ үеэр УИХ-ын гишүүн П.Анужин "Эм зайлшгүй хэрэглэх шаардлагатай иргэддээ эмийн хөнгөлөлт үзүүлж, эмийн хөнгөлөлт авах тогтолцоог хялбар болгох маш чухал. Энэ асуудлыг дэмжиж байгаа. Байнгын эм хэрэглэх шаардлагатай хичнээн иргэд буйг судлан мэдэж, монгол улсын хүн амын хичнээн хувь, хичнээн айл өрх эмийн хамааралтай байгааг тогтоож, түүний шалтгаан, үр дагаварыг шинжлэх нь үндэсний аюулгүй байдалд хамаарах асуудал мөн.

Гэвч энэ бүхэн нэгэнт өвдсөнийх нь дараа авч буй “цаг хоцорсон” арга хэмжээ.

Хүн ардаа өвдөхөөс нь өмнө урьдчилан сэргийлэх эрүүл мэндийн хариуцлага, боловсролыг сайжруулж, өнөөгийн бидний ууж идэж буй хоол хүнс бидний эрүүл мэндэд хэрхэн нөлөөлж буй тухай шинжлэх ухаанд суурилсан судалгаа хийж, хоол хүнсний чанар хүртээмж, тэр дундаа сургууль цэцэрлэгийн хоолны орц найрлагат, шимт чанарт цаг алдалгүй анхаарах нь ихээхэн чухал. Өвдсөнийх нь дараа хөөж эмчлэх бус, өвдөхөөс нь өмнө урьдчилан хамгаалах, иргэдээ эрүүл мэндийн боловсролтой болгож, соён гэгээрүүлэх асуудал эрүүл мэндийн салбарт хэрэгжүүлж буй төрийн бодлого бүрийн амин чанар, зорилго байх ёстой. Үүнийг ажил үйл болгохын төлөө хичээн зүтгэнэ" гэлээ.