Нийслэлийн МАН-ын Удирдах зөвлөлийн V дугаар хурал хуралдаж хотын даргад УИХ-ын гишүүн Д.Сумъяабазарыг томилохыг дэмжжээ.

Түүнийг хотын даргаар дэмжсэнтэй холбогдуулан Сонгинохайрхан дүүргийн 28 дугаар тойрогт нөхөн сонгууль явуулах эсвэл томсгосон тойрог учраас иргэдийн авсан саналаар дөрөвдүгээрт бичигдсэн нэр дэвшигчийг нөхөн томилох эсэх асуудал яригдаж байна.  

Хэрэв иргэдийн авсан саналаар дөрөвдүгээрт бичигдсэн нэр дэвшигчийг нөхөн томилно гэвэл Ерөнхийлөгч асан Н.Энхбаярын ууган хүү Э.Батшугарт боломж олдож байна гэсэн үг. Учир нь тус тойрогт УИХ-ын гишүүн Н.Учрал иргэдийн саналаар нэгээр гарч, Д.Сумъяабазар, П.Анужин нар сонгогдон Э.Батшугар шугамын доор буюу дөрөвдүгээрт жагссан билээ.  

Нөхөн сонгууль боллоо ч гол өрсөлдөөн Э.Батшугарт, НИТХ-ын төлөөлөгч асан С.Мөнхчулуун нарын хооронд явагдах нь тодорхой. Тэгэхээр түүнд ялалт байгуулах боломж бий гэсэн үг.

Б.Лхам