Найман автобус дүүрэн хятад иргэнийг аравдугаар сарын 21-22-ны шилжих шөнө Замын-Үүдийн хилээр нэвтрүүлж буй бичлэг цахим орчинд түгсэн. Тэгвэл энэ нь Монгол Улсын Засгийн газар, Улсын Онцгой комиссын шийдвэрээр Налайх, Дарханы замын бүтээн байгуулалтад ажиллуулах Хятадын инженер,  техникийн 74 ажилтан байсан аж.

Тэднийг өчигдөр  буюу аравдугаар сарын 21-ний өдөр хилээр нэвтрүүлжээ. Холбогдох албаныхан нарийвчилсан шинжилгээ, үзлэгт хамруулж, хяналт шалгалтын дагуу нэвтрүүлсэн гэх бөгөөд 21 хоног тусгаарлах юм байна.

Мөн энэ  өдөр  ажиллах хүч нэрийдлээр  100 хятад иргэнийг оруулжээ. Гэвч тэднээс нэг нь өндөр халуунтай байсан тул түүний сууж явсан автобусыг хил нэвтрүүлэлгүй буцаасан байна. Автобусанд өндөр халуурсан иргэнтэй ойр байсан 26 хятадуудыг ч мөн нутаг буцаажээ.

Харин үлдсэн 74 хүнийг хилээр нэвтрүүлэн, тусгаарлах байр руу нь шилжүүлжээ. Өнөөдрийн байдлаар, Сэлбэ ресорт амралтад 130 хятад иргэнийг тусгаарлаад байгаа гэсэн мэдээлэл байна.

У.Тэргэл