Шадар сайд С.Амарсайхан болон Нийслэлийн Засаг дарга бөгөөд Уланбаатар хотын захирагч Д.Сумъяабазар нар өнөөдөр Улсын Хоёрдугаар төв эмнэлэгт коронавирусний халдварын эсрэг дархлаажуулалтад хамрагдсан байна. Тэд БНХАУ-ын Синофарм вакциныг хийлгэжээ. 

БНХАУ манай улсад 300 мянган хүн тун вакцин хандивласан. Тухайн үед Эрүүл мэндийн сайд С.Энхболд, "БНХАУ-ын Синофарм вакциныг эмнэлзүйн гуравдугаар шатлалыг давсан. ДЭМБ гуравдугаар сард зөвшөөрөл гарах мэдээлэл байгаа. Тиймээс бид зөвшөөрөл гартал хадгалж байгаад зөвшөөрөл гарсан үед дархлаажуулалтад хэрэглэнэ" хэмээж байсан. 

Одоогоор БНХАУ-ын Синофарм вакциныг ДЭМБ албан ёсоор бүртгэж аваагүй байгаа. Гэсэн  ч манай улс тус вакциныг дархлаажуулалтад ийнхүү ашиглаж эхэллээ. 

Ташрамд өгүүлэхэд, Синофармын энэ вакциныг одоогоор бизнесийн зорилгоор 20 гаруй улсад экспортлож байгаа аж. БНХАУ-ын Синофарм компани, Бээжингийн биотехнологийн хүрээлэнгийн хөгжүүлсэн Verocell вакциныг яаралтай нөхцөлд хэрэглэх зөвшөөрөл олгох асуудлыг ДЭМБ судалж байгаа бол Монгол Улсын ЭМЯ-ны харьяа Хүний эмийн зөвлөл энэхүү вакциныг яаралтай нөхцөлд хэрэглэх зөвшөөрлийг олгоод байгаа. Энэхүү вакцин нь 18-59 насныханд тарихад тохиромжтой аж.

Хотын дарга Д.Сумъяабазар вакцинжуулалтад хамрагдсан талаар "Өнөөдөр Улсын Хоёрдугаар төв эмнэлэгт коронавирусийн халдварын эсрэг дархлаажуулалтын БНХАУ-ын Синофарм вакциныг Шадар сайд С. Амарсайханы хамт хийлгэлээ.

2021 оны 02 дугаар сарын 23-ны өдрөөс буюу дархлаажуулалт эхэлснээс хойш нийт 26 мянга гаруй иргэнийг хамруулаад байна. Өнөөдрөөс Хил хамгаалах, Улаанбаатар цахилгаан түгээх, эрүүл мэндийн салбар, тохижилт үйлчилгээ, цэвэрлэх байгууламж, Дотоод хэргийн их сургууль зэрэг байгууллагын ажилтан, алба хаагчдыг дархлаажуулж эхэллээ.

Дархлаажуулалтыг 1800 ажилтан, сонсогчид урьдчилсан үзлэг, эрүүл мэндийн бүртгэл хийн дархлаажуулж, биеийн байдлыг нь 15-30 минут ажиглаж байна. Одоогоор вакцины сөрөг урвал үзүүлсэн тохиолдол гараагүй байна. Гэхдээ тухайн хүний биеийн онцлогоос хамаарч толгой өвдөх, дотор муухайрах, халуурах, вакцин хийлгэсэн газарт бага зэрэг хавдах зэрэг шинж тэмдэг илэрч болзошгүйг эмч, мэргэжилтнүүд хэлж байна" хэмээн мэдээлэв. 

Б.Баатар