Хөдөө орон нутаг руу зорчих хөдөлгөөнийг нээсэнтэй холбогдуулан гуравдугаар сарын 1-6-ны өдрүүдэд шинжилгээний цэгийн тоог нэмж,  22 болгосон. Өнөөдрийн байдлаар, нийслэлийн төвийн дүүргүүдэд  8 цэг ажиллаж байгаа бөгөөд шинжилгээ өгөх иргэд "Гэрэгэ.мн" сайтад хандан, цаг авах ёстой юм.

Зарим үед цаг дүүрэх асуудал гарч байгаа учир иргэдэд бухимдал, бөөгнөрөл үүсгэх асуудал гарсаар байгаа юм. Тиймээс шинжилгээ өгөх иргэдийн дийлэнх буюу 90 хувь нь хөдөө орон нутгийг зорьж байгаа тул цэгийн тоог нэмэх боломжтой эсэхийг НЭМГ-ын дарга Б.Бямбадоржоос тодруулсан юм.

Тэрбээр "Шинжилгээний цэгийг нэмэх боломжгүй. Хөдөө явахад тухайн аймаг, сум иргэдээс шинжилгээ шаардах зэргээр зохицуулалт хийж байгаа. Энэ нь буруу биш. Гэхдээ орон нутгийнхан өөрсдөө тухайн газарт очиж байгаа иргэдээс PCR болон түргэвчилсэн шинжилгээ авах зэргээр зохицуулбал илүү үр дүнтэй. Хөдөө орон нутаг руу явах иргэдээс хэд хоногийн өмнө өгсөн PCR шинжилгээний хариу шаардах нь өрөөсгөл. PСR шинжилгээ гэдэг нь тухайн агшных байдаг. Тиймээс аймаг, сумдын эмнэлэг PCR шинжилгээ авдаг болчихвол нийслэлийн энэ ачаалал эрс багасна” гэлээ.

У.Тэргэл