УОК-ын дарга, Шадар сайд С.Амарсайхан Халдварт өвчин судлалын үндэсний төвд ажиллаа. Энэ үеэр тус төвийн дэд захирал Э.Тэмүүлэн нөхцөл байдлыг танилцуулав. 

Тэрбээр “Халдвар дотоодод тархсан үед хөл хорио тогтоосон. Энэ хугацаанд халдварын тоо буурч байсан ч хөл хориог сулласан үеэс халдварын тоо нэмэгдсэн. Гурван эмнэлэг рүү бүх батлагдсан тохиолдлуудаа хуваарилснаар халдварыг цааш нь тархахгүй болгож байгаа. Ингээд ойрын хавьтлуудыг тодорхойлох ажлыг явуулдаг. Судалгааны үр дүнд нийт хавьтлуудын 90-ээс дээш хувийг олдог. Олсон хавьтлуудаа 14 хоног тусгаарлаж байгаа. ХӨСҮТ-ийн хувьд ямар ч өвчлөлгүй үед бэлэн байдлаа хангаж байсан. Алаг цоог хэлбэрээр тархах үед тогтоон барих аргачлалыг барьж ажилласан. Харин тохиолдлын тоо ихсээд, хүн амын дунд өргөн тархалт үүссэн үед тандалтын хариу арга хэмжээ өөрчлөгддөг. Энэ үед батлагдсан тохиолдлуудаа хөнгөн бол гэрт нь тусгаарлах гэх мэт арга хэмжээ авч байна. 

Сүүлийн 7 хоногийн нөхцөл байдлаас харахад хүн амын дундах халдвар өргөн тархалт руу орж байгаа нь санаа зовоож байна. Халдварын үе шатын үнэлгээг хийхэд Улаанбаатар хотод дөрөвдүгээр үе шат буюу хүн амын дунд халдвар өргөн тархах үе дээрээ байна. Харин Завхан, Төв аймаг хоёрдугаар үе шат буюу алаг цоог хэлбэрээр тархах үе дээрээ байгаа. 

Гуравдугаар сарын 10-ны байдлаар бүртгэгдсэн 81 кластер тохиолдол байна. Үүнээс 19 нь хянагдаж дууссан бол хяналтад орсон 21 тохиолдол байгаа. Одоогийн байдлаар 41 идэвхтэй кластер байна. Халдвар зөвхөн орон зайгаар хязгаарлагдахгүй. Драмын театртай холбоотой кластер олон хүнийг хамарч, 450 ойрын хавьтал бүртгэгдсэн. Үүнээс 113 тохиолдол бүртгэгдээд байгаа юм. Өдөр бүрийн тоон мэдээллийг холбогдох байгууллагад гаргаж, ДЭМБ-д мэдээллээ солилцдог.

Өчигдөр хийсэн тооцооллоор 14 хоногийн дараа өдөрт хамгийн багадаа 150-400 хүртэл халдвар гарах магадлал 50 хувьтай байна. Шинжилгээний лаборторийн ачаалал, эрүүл мэндийн байгууллагын ажилчдын илүү цаг, ажлын ачаалал, цалин хангамж гэх мэт тулгамдсан асуудал байна" гэдгийг дуулгалаа. 

Б.Баатар