УОК-ын дарга, Шадар сайд С.Амарсайхан өнөөдөр Халдварт өвчин судлалын үндэсний төвд ажилласан талаар бид мэдээлсэн. Тэрбээр энэ үеэр ХӨСҮТ-ийн ажил хангалтгүй байгааг шүүмжлээд, ажлаа нарийн зохион байгуулалттай хийхийг анхааруулсан юм. 

Шадар сайд С.Амарсайхан "ХӨСҮТ-ийн зохион байгуулалтыг  сайжруулж, шинэчлэн зохион байгуулахгүй бол шаардлага хангахгүй байна. Авч хэрэгжүүлж байгаа арга хэмжээ нь илүү түргэн шуурхай байх ёстой.

Дотоод зохион байгуулалт тааруу, мэдээлэл өгч байгаа хүмүүс ажил руугаа сайн ороогүй байна. Өмнө өгсөн үүрэг даалгаврыг хангалттай биелүүлээгүй байна. Хамгийн гол нь бүх мэдээ мэдээллийн урсгалыг цахимжуулах хэрэгтэй. Ер нь иргэдэд хүрч байгаа үйлчилгээ ямар нэгэн хүндрэлгүй байх ёстой.

Ариутгал халдваргүйтгэлээс эхлээд шинжилгээ, хэрэгжүүлж байгаа мэдээлэл ил тод байх ёстой гэдэг гол ажлаа хийхгүй байна. Дутуу байна. Бид цаг алдах эрхгүй. Хэдийгээр та бүхэн бүх ажлыг зохион байгуулж байгаа ч дотоод зохион байгуулалтдаа яаралтай арга хэмжээ авах хэрэгтэй байна. Ялангуяа тандалт судалгаагаа өргөжүүлж, хавьтлыг тогтоох арга зүйг өргөжүүлж, шинэчлэх шаардлагатай. Бидний авч хэрэгжүүлж байгаа ажил, шийдвэр газар дээрээ хангалтгүй байгааг харлаа. Лабораторийн хүчин чадал, хүн хүч, ажилчдын цалин хөлс,  илүү цагийн асуудлыг яаралтай шийдвэрлэх хэрэгтэй.Тэмүүлэн даргын танилцуулж байгаа мэдээллийг яг үнэндээ бид бүгдээрээ л мэднэ. Гэтэл яг энэ мэдээлэл чинь газар дээрээ хэрэгжихгүй байна. 

Бүх ажлаа нарийвчилсан судалгаагаар хийж, шинэчилсан арга барилаар ажиллах хэрэгтэй. Наад захын мэдээллээ цахимжуулах шаардлагатай. Хэдийгээр байгууллагын удирдлага солигдсон ч төрийн ажил тасралтгүй явах ёстой. Тиймээс бүх ажлыг цахимжуулах ёстой. Та бүхний ажил удаан байна. Хурдан хийх хэрэгтэй. Тандалтын тоон мэдээллийг өгч байгаа байдал нь үнэхээр хангалтгүй байна. Хэдэн хүн халдвар авсан, хавьтлын тоон мэдээллээ шууд хэлчих чадваргүй, мэдээлэлгүй байж хэрхэн цааш ажиллах юм бэ. Та бүхэн ийм байхад иргэдэд асуудал тулгарах нь ойлгомжтой. Тиймээс ч шүүмжлэл дагуулаад байна. Үүнийгээ яаралтай засч залруул" гэдгийг анхаарууллаа. 

Б.Баатар