Манай улс коронавирусний халдварыг дотооддоо алдах шалтгааны буруутан нь “Энхсаран” сувилал болж, өдгөө тус хэргийг хуулийн байгууллага шалгаж буй. Халдвар хамгааллын дэглэм баримтлаагүй Баянзүрх дүүргийн нэгдсэн эмнэлгээс халдвар тархаж, олон хүн өвчилсөн асуудал гарсан.  Мөн л энэ хэргийг шалгаж байгаа гэдгийг албаныхан хэлдэг.

Энэ бүхний асуудал шийдэгдэж амжаагүй байтал сувиллын газраас халдвар тархаж, ногоон бүс болоод байсан аймгууд коронавирусний тохиолдол бүртгэгдсээр байна.  “Сэмжид хужирт” сувилалд гуравдугаар сарын 1-25-ны хооронд 13 аймгийн 174 иргэн амарч, улмаар 27-ны байдлаар эдгээр хүмүүсийн 62 хүнд нь халдвар илрээд байгаа юм.

Халдвар илэрсэн хүмүүсийн ойрын хавьтлуудыг тусгаарлалтад авч, орон нутгууд хяналтаа тавьж байгаа гэдгийг Эрүүл мэндийн яамнаас мэдээлсэн. Түүнчлэн халдвар бүртгэгдсэн аймгуудыг улаан түвшинд шилжүүлж, хөл хорио тогтоогоод байгаа билээ.

Тэгвэл тус амралтын газраас яагаад халдвар тархав гэдэг нь асуултын тэмдэг хэвээр энэ бүхнийг талаар ам нээх хүн алга.

Харин өнгөрсөн долоо хоногт тус сувиллын захирал А.Бямбасүрэн мэдэгдэл гаргаж, “Бид буруугүй” гэдгээ илчилжээ.

Тэрбээр “Сэмжид хужирт” рашаан сувиллаас эхэлж илэрсэн болохоос халдвар хаанаас анх тарсныг одоогоор хэн ч тогтоогоогүй. Төрийн байгууллага нь 400 хүнд хуурамч шинжилгээ бичиж өгөөд орон нутаг руу тараачихсан энэ тохиолдолд бид хэнд итгэж найдах юм бэ.

Төр удирдаж буй дарга нар нь үйл олноороо маскгүй тэврэлдэж буйгаа телевизээр сурталчилж байхад бид иргэдэд халдвар хамгааллын дэглэм сахиулахад амаргүй байлаа. Бидэнд дотоод алдаа гарсан байхыг үгүйсгэхгүй ээ. Буруугаа бусад руу чихэх бодол ч алга. Энэ завхралын эцсийн тусгал болж, хамт олноороо яллуулж буйдаа үнэхээр харамсаж байна” хэмээсэн байна.

Түүний өгүүлж буйгаар сувиллын газраас халдвар тархсан нь төрийн байгууллагын алдаа, дарга нарын буруу бололтой. Эхнээсээ алдаа завхарлыг алгасаж, буруутны “толгойг илж” суугаагүй бол энэ мэт асуудал гарахгүй байсан нь дамжиггүй.

Олон нийтийн амь насанд заналхийлсэн халдварт өвчин голомтлон тархаж буй газрууд хариуцлагаас мултарч, иргэд эрүүл мэндээрээ хохирсоор байх уу гэдэгт албаныхан анхаарал хандуулахад илүүдэхгүй биз.

Түүнчлэн “Сэмжид хужирт” рашаан сувиллын захирал А.Бямбасүрэнгийн мэдэгдэл их л уянгалаг аж. Тодотговол “Бид модоо хагалж, усаа зөөж, тоосгоо эвлүүлсээр өнөөдрийн түвшиндээ ирсэн. ЭМ-ийн байгууллагад боловсролын яамнаас бусад бараг бүх яамнаас шалгалт орж ирдэг. Өгүүлбэрийнхээ заалт бүрийн эхнээс огтлоно, тайрна гэсэн хууль журамын “ГАЛ” дунд төрийн дарамтыг хангалттай амсаж яваа” хэмээжээ.

Энэ нь нөгөө л сонгууль бүрийн өрөвдүүлэх “тактик” гэдэгтэй өнгө ижил харагдав. Мөн сувилалд амарч байсан хүмүүс бүгд шинжилгээний бичигтэй байсан, бид халдвар хамгааллын дэглэмээ баримталж ажилласан гэдгийг ч удаа дараа мэдэгджээ. Үнэхээр тэд буруугүй буруутан болсон нь уу эсвэл... гэдгийн хариулт удахгүй ил болох биз.

Ямартай ч тус сувиллын захирал А.Бямбасүрэн ногоон бүс болсон аймгуудад халдвар тархах голомт болсондоо уучлалт хүсэх бус буруугүй хэмээн “чичирч” мэдэгдэл гаргасан нь олны дургүйцлийг төрүүлээд байгаа юм. Нөгөөтэйгүүр түүний ийнхүү яарч мэдэгдэл гаргасан нь ёстой л нөгөө гэмт хүн хэлбэлзэнэ гэгчийг сануулах шиг.

Б.Баатар