Монгол эрдэмтдийн  бүтээсэн шүлснээс коронавирусний халдвар илрүүлэх оношлуурыг өнөөдрөөс хэрэглээнд нэвтрүүлж эхлэх сайхан мэдээ байна. АШУҮИС-ийн оюутан, багш ажилчдад анх туршиж эхлэх энэхүү оношлуур нь Монгол Улсын хувьд дотоодын оношлуурыг бүртгэн авсан анхны тохиолдол бөгөөд хамгийн тэмдэглүүштэй нь дэлхийд анхдагч оношлуурын цомог гэдгээрээ тэмдэглэгдэн үлдэх юм байна.

Энэ талаар оношлуурыг бүтээсэн эрдэмдийн багийнхан ийнхүү бичжээ. “Маш олон хүний оролцоотойгоор бүтсэн хэдий ч хэд хэдэн байгууллага, хүмүүсийг онцгойлон дурдахгүй байж боломгүй санагдаж байна.Үүнд, уг ажлыг онцгойлон анхаарч дэмжсэн УОК-ын дарга С.Амарсайхан танд талархаж байна. Мөн оношлуур бүртгүүлэх ажлыг хурдан шуурхай бүтээх гэж өдөр шөнөгүй цуцалтгүй ажилласан АШУҮИС-ийн тэргүүн дэд захирал Г.Батаатар багшдаа гүнээ талархаж байна. Монгол талын ажлыг зохион байгуулах энэ ажилд багшийн маань нөр их хөдөлмөр зүтгэл болон удирдан зохион байгуулах чадвар үнэхээр их рольтой байсныг энд тодотгох нь зүйтэй болов уу.Мөн уг ажлыг эхнээс нь дэмжиж, тал бүрийн туслалцаа үзүүлсэн АШУҮИС-ийн захирал Хүрэлбаатарт талархал дэвшүүлж байна.

Монголчууд бид зөвхөн гадаадын гэх шошготой эд зүйлийг шүтэж, оруулж ирж хэрэглэх биш эх орондоо хийж, бүтээж болдог юм байна гэдгийг батлан харуулж чадсандаа баяртай байна. Бид үүнээс хойш шинжлэх ухаандаа итгэж, монголчуудын гадаадынхнаас дутахгүй хийж, бүтээж чаддаг ард түмэн гэдгээ мянгантаа батлан харуулах хэрэг гарах нь мадаггүй ч гэсэн замын голоосоо мятралгүйгээр явбал болдог, бүтдэг гэдгийг харуулж чадсандаа сэтгэл өег байна. Ажил ингээд дуусах биш, харин яг одооноос ид эхэлж байна. Бүгд дор бүртээ чандлан хичээцгээе” хэмээн сэтгэлийн үгээ үлдээж байна.

Одоогийн ид хэрэглэж буй гадаадаас өндөр үнээр худалдан авч буй PCR шинжилгээний бамбарын дэргэд монгол эрдэмтдийн зохион бүтээсэн шүлснээс халдвар илрүүлэх оношлуур нь нэгдүгээрт, 2-3 дахин хямд өртгөөр бүтнэ, хоёрдугаарт, шинжилгээний хариу богино хугацаанд буюу 90 минутад гардгаараа онцлогтой бас ихээхэн давуу талтай юм.

Цаашлаад хамарнаас бамбараар шинжилгээ авч, иргэд айдас хүйдэстэй байсан бол дотоодынхоо оношлуурыг ийнхүү хэрэглээнд нэвтрүүлснээр энэ бүхэн үгүй болж, мөн та зориулалтын саванд шүлсээ хийн, лабораторид авчирч өгч, эсвэл хөдөө, орон нутгаас ч явуулж болох ийн боломжийг олгож байгаагаараа ихээхэн давуу тал, онцлогтой гэдгийг монгол эрдэмтэд маань онцолж байгаа.

У.Тэргэл