Олон улсын эмч нарын өдөр" өнөөдөр тохиож байна. Цагаан нөмрөгт баатрууд маань энэ өдөр баяраа тэмдэглэх атал эсрэгээрээ төр, засагт хандлаа. Тодруулбал, "Цар тахал ба цалин хөлс" сэдвийн хүрээнд Эрүүл мэндийн ажилтны үйлдвэрчний эвлэлийн холбооноос мэдээлэл хийлээ. Цар тахлын үед голомтот ажиллаж буй эмч нарын илүү цагийн хөлс харилцан адилгүй байгаагаас гадна зарим дүүргийн эрүүл мэндийн төвүүд өрөнд орж, хаалгаа барих хэмжээнд хүрчээ. Тиймээс Ерөнхий сайдад хандан шаардлага хүргүүлжээ. Шаардлагад,

-Эрүүл мэндийн салбарын ажилтнуудын цалинг хоёр дахин нэмэгдүүлэх,

-Илүү цагийн хөлсийг олгох асуудлыг нэн даруй шийдвэрлэж, ялгаварлалгүй олгох гэжээ.

Мэдээллийн үеэр Эрүүл мэндийн ажилтны Үйлдвэрчний эвлэлийн холбооны дарга Х.Ариунаа “Өнөөдөр хэдий баярын өдөр ч гэлээ олон мянган эмч нарын дуу хоолойг төр, засагт хүргэхийг хүссэн. Цар тахалтай тэмцэн ажиллаж байгаа ажилтнуудын ачаалал ихэсч байна. Бид өнөөдрийг хүртэл нэг ч удаа гомдоллоогүй. Сүүлийн өдрүүдэд өвчтөний тоо эрс нэмэгдэж, эмч ажилчид маань ядарч туйлдан, цөхөрч байна. Тиймээс эмч, сувилагч, ажилчдын цалин хөлсийг нэмж, илүү цагийн хөлсийг нь ялгаварлалгүй олгох хэрэгтэй байна.  Хэдийгээр цар тахлын үед энэ салбарынхан хууль дүрмээ даган, тангаргаа биелүүлж ажиллах ёстой ч нөгөө талдаа цалин хөлс нь амьдралд нь хүрэлцэхгүй хэцүү байна. Цаг наргүй ажиллаж, бие махбодь нь ч ядарч, сүүлдээ өөрсдөө өвчилж байна гэлээ. Цаашлаад их эмчийн дундаж цалин 750-850 мянга, сувилагчийнх 670-720 мянга, эрүүл мэндийн ажилтных 470-500 мянга бөгөөд салбарын нийт ажилтны 90 хувь нь цалингийн зээлтэй. Цалингаас 26 хувийг нийгмийн даатгалын шимтгэлд өгч, банкны зээлээ төлөөд гар дээрээ 20-30 мянган төгрөгтэй л үлддэг.  Энэ  зөвхөн эрүүл мэндийн байгууллагын ажилчдынх бус 3.2 сая монгол хүний амь настай холбоотой асуудал” гэлээ.

Үйлдвэрчний хорооны дарга О.Баатарчулуун энэ талаар “Эмч нартаа Олон улсын эмч нарын баярын өдрийн мэнд хүргэе. ХӨСҮТ-ийн эмч, эмнэлгийн ажилчид жил гаруйн хугацаанд халдварын голомтод ажиллахдаа цалин хөлсийг нэгдүгээрт тавьж ажиллаагүй. Ард иргэдийнхээ эрүүл мэндийг хамгаалах үүднээс сурч мэдсэн ашиглая гэж зорьж, бүх хүчээ шавхаж ирлээ. Манай улс вакцинтай золгосон учир бид өнгөрсөн долоо хоногоос цалин хөлсний асуудлаар дуугарч эхэлсэн гэлээ.

Цаашлаад халдварт өвчний голомтод болон гамшгийн үед дайчилгаагаар ажилласан эрүүл мэндийн ажилтанд тухайн дайчилгааг зохион байгуулсан газар нэг сарын дотор ажилласан хугацааны цалин хөлсийг нь гурав дахин нэмэгдүүлж олгоно гэж заасан байдаг. Харин энэхүү заалт өнөөдөр хэрэгжихгүй байна. Мөн ХӨСҮТ-ийн 50 гаруй ажилтан халдварын голомтод ажиллаж байгаад халдвар авсан. Иймд буцалтгүй тэтгэлгийг хуулийн дагуу олгож өгөхийг хүсэж байна. Түүнчлэн илүү цагийн мөнгийг голомтоос гарч ирэхэд нь өгдөг байх хэрэгтэй. Арай гэж шахаж, шаардаж байж дөрвөн сар гаруй хугацааны дараа мөнгөө авч байх жишээтэй” гэв.

Мөн тэд төр, засаг шаардлагынх нь хариуг ойрын үед өгөхийг шаардаж, эн тэргүүнд илүү цагийн нэмэгдэл цалин, хөлсийг яаралтай олгохыг хүслээ.

У.Тэргэл