Хугацаат цэргийн алба хаагч харамсалтайгаар амь насаа алдсантай холбогдуулан Зэвсэгт хүчний жанжин штабын удирдлагууд мэдээлэл хийлээ.

Зэвсэгт хүчний жанжин штабын Ажиллагааны Удирдлагын газрын дарга бригадын генерал С.Дашзэвэг: Зэвсэгт хүчний 326 дугаар ангийн салааны захирагч, дэслэгч Г нь гуравдугаар сарын 28-ны өдөр харуулын даргын үүрэг гүйцэтгэж байх үедээ харуулд гарч байсан байлдагч Б-ын биед халдан хүнд гэмтэл учруулсан. Монгол Улсын Зэвсэгт хүчний жанжин штаб, Хуурай замын цэргийн командлалаас яаралтай арга хэмжээ авч, байлдагч Б-г Төрийн тусгай албан хаагчдын нэгдсэн эмнэлэгт цаг алдалгүй хүргэж, эмнэлгийн яаралтай тусламж үзүүлж байсан боловч байлдагч Б гуравдугаар сарын 30-ны өдөр харамсалтайгаар амь насаа алдлаа.

Талийгаачийн ар гэр, төрөл төрөгсдөд Монгол Улсын Батлан хамгаалах яам, Зэвсэгт хүчний жанжин штаб, зэвсэгт хүчний нийт бие бүрэлдэхүүний нэрийн өмнөөс гүн эмгэнэл илэрхийлж, уучлалт хүсэж байна. Гарсан хэрэг зөрчилтэй холбогдуулан шалгалтын ажиллагааг явуулж байгаа. Мөн дараах шийдвэрүүдийг гаргаад явж байна. Нэгдүгээрт, 326 дугаар ангийн захирагчаар ажиллаж байсан хурандаа С.Батболдыг албан үүрэгт ажлаас нь чөлөөллөө. 

Хоёрдугаарт, Хуурай замын цэргийн командлалын зарим албан тушаалтан хэрэг гарсан тухайн өдөр ажиллаж байсан алба хаагчдад шат дараалсан арга хэмжээ авахаар ажиллаж байна. Түүнчлэн Батлан хамгаалахын сайд, Зэвсэгт хүчний жанжин штабын дарга 2021 оны гуравдугаар сарын 30-ны өдөр зэвсэгт хүчний нийт бие бүрэлдэхүүнийг хамруулан цахим хурал зохион байгуулж, үүрэг чиглэл өгөөд байна. Үүнд: Цар тахлын нөхцөл байдалтай уялдуулж бүх шатны офицер, ахлагч нарын албаны төлөвшил, мэргэжлийн бэлтгэлийн түвшинг яаралтай тогтоохоор шийдвэрлээд байна.  Хугацаат цэргийн алба хаагчдын нөхцөл байдлыг эцэг эх, ар гэрийнхэнд нь танилцуулах арга хэмжээг хэвлэл мэдээллийн байгууллагуудтай хамтран хэрэгжүүлэхээр шийдвэрлээд байна. 

Цэрэг зодож аминд нь хүрсэн салааны дарга Г-г Хан-Уул дүүргийн цагдаагийн хоёрдугаар хэлтэст шалгаж байна. Цаашид ийм зүйл гаргахгүйн тулд Хуурай замын цэргийн ангийн бусад албан тушаалтнуудыг шалгаж, цэргийн алба хаагчдад ёс зүйн сургалт оруулна. Байлдагч Б-г нас барсан үндэслэлээр хуулийн дагуу ар гэрт нь таван жилийн цалин хөлстэй тэнцэх хэмжээний нэг удаагийн тэтгэлэг болон оршуулгын зардлыг Зэвсэгт хүчний жанжин штабаас гаргах шийдвэр гарсан.

Б.Амгаланбаатар: Бид хариуцлага хүлээнэ. Хариуцлагаас зугтахгүй

Хуурай замын цэргийн команплагч Бриагдын генерал Б.Амгаланбаатар: Зэвсэгт хүчний жанжин штабаас гүн эмгэнэл илэрхийлье. Анги бүрэлдэхүүнээрээ амарч байсан ба үлдсэн бүрэлдэхүүн харуул манааны үүрэг гүйцэтгэж байсан. Өнөөдөр хэрэг боллоо маргааш нь таслан зогсоох боломж алга. Бид боломжит аргаа хэрэглэж таслан зогсоох тал дээр хууль хяналтын байгууллага, хүний эрхийн байгууллагатай хамтран ажиллаж байна. Харамсалтай нь үр дүн сайн гарахгүй байна. 

Бид хариуцлага хүлээнэ. Хариуцлагаас зугтахгүй ээ. Хуурай замын цэрэг нь ганцхан намрын цэрэг татлагатай. Саяны асуудал офицер цэрэгтэй харьцсан үйлдэл. Зүй бус харьцаа гардаггүй ангиуд бий. Харин гараад байгаа үйлдлийг таслан зогсоох ажлыг үе шаттай зохион байгуулах болно.

Цэргийн ангид архидалт байх ёсгүй. Хугацаат цэргийн алба хаагчдын байранд камертай. Шаардлагатай бол цагдаагийн байгууллагаас бичлэгийг гаргаж болно. Гэхдээ бүх газрыг камержуулах боломжгүй байна. Хүний сэтгэхүйд байгаа зүйлийг арилгахгүй л бол энэ ёс бус зүйлийг зогсоох хэцүү. Гарсан гэмт хэрэгтэй тэмцээнд үр дүнд хүрэхгүй байгааг ойлгож байна. Урьдчилан сэргийлэх бүхий л арга хэмжээг авч байгаа.  Цэргийн дүрмээр тогтоосон хэм хэмжээ гэж бий. Бас офицер ахлагчийн ёс зүйн дүрэм гэж бий. Энэ дүрэм журмын дагуу л ажиллах ёстой юм. 

БХЯ-ны Гадаад хамтын ажиллагааны газрын дарга, хурандаа Д.Ариунболд: ЗХЖШ болон Батлан хамгаалах яамны зүгээс цэргийн сахилга зохион байгуулалттай гарч байгаа хэрэг зөрчлийг судлан шалгадаг. Урьд нь гарч байсан цэрийн албаны сахилга зохион байгуулалттай зөрчил, гэмт хэргийн шинж чанартай үйлдлүүдийг тухай бүрд нь хууль хяналтын байгууллагад шилжүүлэн шалгадаг.

Сүүлийн жилүүдэд Зэвсэгт хүчний хэмжээнд гарч байгаа гэмт хэрэг болон хөдөлмөрийн аюулгүй байдалтай холбоотой осол зөрчлүүдийн талаар судалгааны ажил явуулан холбогдох албанд танилцуулж, цаашид авч хэрэгжүүлэх ажлаа бүрэн тодорхойлсон.

Мөн цэргийн албаны сахилга зохион байгуулалтын зөрчил гаргасан цэргийн ангийн удирдлага болон холбогдох алба тушаалтнуудад цэргийн сахилгын дүрмийн дагуу сахилгын шийтгэл оногдуулсан. Тухайлбал, хамгийн сүүлд Зэвсэгт хүчний 032 дугаар анги дээр цэргүүд дүрмийн бус харьцаа гаргасан зөрчлийг шалгаж, холбогдох албан тушаалтнууд буюу тухайн өдөр ажиллаж байсан офицер, ахлагч нарт цэргийн сахилгын дүрмийн 32-т зааснаар сахилгын шийтгэл оногдуулж, зарим албан тушаалтны цолыг бууруулан өөр анги руу шилжүүлэх арга хэмжээ авсан.

Тухайн хэргийг үйлдсэн гэх дэслэгч Г-ийн урьд нь гаргаж байсан сахилгын зөрчлийн асуудалд ч албаны шалгалт явуулж байна. Цагдаагийн байгууллагын шалгалтаар дэслэгч Г нь тухайн үед архи, согтууруулах ундаа хэрэглэсэн болох нь урьдчилсан байдлаар тогтоогдсон байна. Тухайн үед танхайн сэдлээр үү эсвэл өөр ямар сэдлээр энэ хэргийг үйлдсэн болох нь хэрэг бүртгэлт, мөрдөн байцаалтын явцад тогтоогдоно.

Б.Баатар