УЕП-ын орлогч прокурор асан Г.Эрдэнэбат өчигдөр "Улаан бал" ярилцлагын нэвтрүүлэгт оролцож, хууль, шүүхийн байгууллага Б.Баасанцогт өмгөөлөгчийн дэлгэгдсэн төлөвлөгөө шиг л явж ирсэн болохыг онцолжээ.

Тэрбээр "Б.Баасанцогт өмгөөлөгчийн компьютерээс бичиг баримт задарч нэлээд шуугиан тарьсан. Үүний өмнө надад нэлээд хардлага төрж байсан. Анх надад эрүүгийн хэрэг үүсгэхэд буюу 2020 оны тавдугаар сарын 27 нд яллагдагчаар татаж, та үүнийг зохион байгуулсан байна гэж хэлсэн. Харин би үүнийг хүлээн зөвшөөрөхгүй байна. тиймээс ийм ийм баримтыг нэмж авч өгөөч, үүний дараа намайг буруутгах эсэхээ шийд. Тэгэхгүй бол та бүхний цуглуулсан баримт дотор яг миний баталсан тогтоол, гаргасан шийдвэр, зөвшөөрөл алга. Эдгээрийг зохих байгууллагаас нь аваад хэрэгтээ хавсаргачих гэсэн хүсэлт гаргасан. Гэтэл тэр ажил огт хийгдээгүй. Тиймээс би мөрдөн шалгах байгууллагад дахин гомдол гаргаж, хүсэлт гаргасан. Ингэхэд зургаадугаар сарын 5нд дахин мэдүүлэг өгчихөөд харьж явтал мөрдөн байцаагч таниар нэг гарын үсэг зуруулж авсангүй гэж хэлсэн. Ингээд араас ирж гарын үсэг зуруулахад прокурорт шилжүүлэх тухай мөрдөгчийн санал дээр гарын үсэг зуруулсан. Ингээд би тав хоногийн дотор мөрдөгдөөд хэрэг прокурорт шилжсэн. Харин 8-ны өдөр нь прокурор дуудаж, яллах дүгнэлттэйгээ танилц гэсэн. Тэрхүү дүгнэлт нь 80 орчим хуудас байсан. 40 хуудас хэргийн материалыг уншаад ийм хэмжээний дүгнэлт бичихэд хамгийн багадаа нэг сарын орчмын хугацаа зарцуулах баймаар. Уг нь журмаараа бол прокурор хэргийг аваад уншиж судлаж байж яллах дүгнэлт үйлдэх учиртай. Тэгэхээр мөрдөн шалгах ажиллагаа, прокурорын ажиллагаа нь маш шахуу хугацаанд хэргийг төлөвлөгөөтэйгээр явуулсан юм байна гэж боддог. 

Ингээд шүүх дээр хэрэг очиход шүүхийн гадна талд жагсаал цуглаан зохион байгуулагдаж, энэ хүмүүс л ял оноовол та бүхнийг шударгаар шүүлээ гэж бодно гэхчлэнгээр уриа лоозон хэлж жагсаж байсан. Энэ бүхнийг хараад би хуульч хүний хувьд "Энэ хэрэг ер нь ямар сонин процесс яваад байна. Прокурор үнэхээр энэ хэргийг бүх талаас нь харж нягталж чадав уу, мөрдөгч миний хүсэлтийг хангасан уу, энэ хэргийг ултай суурьтай мөрдүүлэхийн тулд би ямар шийдвэр гаргасан. Миний эрх хэмжээ хаана дууссан юм, миний өгсөн зөвшөөрөл болон зөвшөөрөх юм нь юу юм, миний зөвшөөрлөөс гадуур юу хийгдсэн гэдгийг нягтлуулах гээд хүсэлт гаргасан байхад авахгүйгээр хугацаагаа шахаад шидчихсэн. Ингээд шүүх дээр ирээд хурал болох гэсэн гадаа нь хүмүүс жагсаад, цахим сүлжээнд шүүгч нарын тухай худал, гүтгэлгийн мэдээлэл гараад байдаг. Гэтэл би тэр шүүгч нарыг нь танихгүй. 

Одоо бодоход Улаанбаатарт хонгилын схем зурагдаад байдаг хөдөө орон нутаг ач холбогдолгүй учраас хаягдчихаад хонгил дотор ороогүй байсан юм шиг байгаа юм. Ингээд шүүх хэргийг баримт дутуу гээд буцаасан.

Энэ бүхний дараа сүүлд Б.Баасанцогтын төлөвлөгөө гэдэг юм илрэхээр бүх юм төлөвлөгөөний дагуу явсан юм байна. Б.Хурц нарын хэргийн таслан сэргийлэх арга хэмжээг өөрчилж, харьяаллыг нь өөрчилж байгаад шийднэ. Ингээд шийдэхээр нь С.Зоригийн хэргийг шинэ илэрсэн нөхцөл байдал дахин сэргээнэ" гэсэн төлөвлөгөөтэй л шүүх хурал байсан юм байна.

Эхлээд хүнээ муухай харагдуулаад дараа нь тэр муухай харагдуулсан хүнээ шүүх дээр аваачаад хэрэв шүүх шийдэхгүй бол чи муухай шүү гэж галын бэлтгэл хийж, шүүх шийдвэрээ гаргаж, тогтоосны дараа чи буруутан шүү гэсэн ийм л арга зүй тогтлоор явдаг болсон юм байна" хэмээжээ. 

Б.Баатар