Засгийн газар өнөөдөр хуралдаж, цар тахалтай холбоотой шийдвэрүүдийг гаргасан билээ. Өмнө нь гуравдугаар сарын 3-наас 18-ныг хүртэлх хугацаанд хатуу хөл хорио тогтоож, халдварыг хумьж, иргэдээ вакцинжуулалтад хамруулах ажлыг шуурхайлахаар болсон  тухай мэдээлж байв. Иргэд ч сэтгэл зүйн хувьд бэлтгэлтэй байлаа. Харин өнөөдрийн Засгийн газрын хуралдаанаас гарсан урьдчилсан мэдээллээр бол, хатуу хөл хорио тогтоохгүй, зарим салбарын үйл ажиллагааг хязгаарлахаар тогтсон гэж байв. Харин Засгийн газраас гарсан албаны шийдвэрийг дөнгөж сая Шадар сайд С.Амарсайхан, Сангийн сайд Б.Жавхлан, Эрүүл мэндийн сайд С.Энхболд, ХӨСҮТ-ийн дарга л.Баттөр, УОК-ын бүрэлдэхүүнтэйгээр таницууллаа.

Шадар сайд С.Амарсайхан: Дөрөвдүгээр сарын 3-наас 14 хоногийн хугацаатай арга хэмжээ авч ажиллахаар болж байна. УОК-оос эрсдэлийг багасгах эдийн засгаа унагачихгүй, айл өрхийн амьжиргаа бусад салбарын үйл ажиллагаанд эрсдэлд оруулахгүй бүх нөхцөлийг тооцож, аль болох уян хатан хандахыг зорьж ажиллаж байгаа. Энэ 14 хоногийн хугацаанд долоо хоног тутам эрсдэлийн үнэлгээ хийж явна. Асуудал, нөхцөл байдал амаргүй байгаа. Тавдугаар сарын 1-ний дотор нэг сая иргэнээ вакцинжуулж дуусгаад, цаашлаад хөдөө аж ахуй, уул уурхай, малчид гээд бүх салбарынхныг хамруулах ажил үргэлжилнэ гэв.