Эх орноо хамгаалах гэж яваад энх цагт амиа алдсан цэрэг эрсийнхээ амийг хэнээс нэхэх вэ. Монгол Улсынхаа дархан хилийг хамгаалаад эр хүн болоод ир гээд явуулсан хүү нь гэртээ эргэж ирэхгүй байх вий гэхээс ээж, аавууд зүрхшээж байна. 
Саяхан Зэвсэгт хүчний 326 дугаар ангийн байлдагч салаан даргадаа зодуулан хэвтэрт орж, улмаар Төрийн тусгай алба хаагчдын нэгдсэн эмнэлэгт эмчлүүлж байгаад ухаан орохгүй байсаар амиа алдсан харамсалтай явдал тохиов. Эх сурвалжуудыг өгч буй мэдээллээр салаан дарга хүүгээс мөнгө нэхэж дарамталсан гэх. Согтуурсан үеэдээ байлдагчаа зодож хүнд гэмтэл учруулсан салаан даргыг одоогоор цагдан хориод байгаа аж. 
Уг асуудлаар Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр “Монгол Улсын Үндсэн хуулиар хүлээсэн иргэний үүргээ биелүүлж, эх орондоо эр цэргийн тангараг өргөн, алба хааж байгаа байлдагчийг зодож, гэмтээнэ гэдэг хэзээ ч байж болшгүй бөгөөд эвлэршгүй зүйл юм. Байлдагчийн биед халдаж, гэмтээсэн асуудалтай холбогдуулан Батлан хамгаалахын дэд сайдын ахалсан Дэг журам, сахилга хариуцлагыг бэхжүүлэх салбар зөвлөл, ЗХЖШ-ын нэгдүгээр орлогчийн ахалсан Дэг журам, сахилга хариуцлагыг бэхжүүлэх салбар зөвлөл тус бүр хуралдаж, шат шатанд нь хариуцлага тооцохоор боллоо. Тухайлбал, Зэвсэгт хүчний 326 дугаар ангийн удирдлага, шат дараалсан албан тушаалтнуудад хатуу хариуцлага тооцно” гэсэн юм.
Эргэн сануулахад, 2019 оны нэгдүгээр сарын 22-ны өдөр Дорноговь аймгийн Зүүнбаян дахь 336 дугаар ангид алба хааж байсан хугацаат цэрэг амь насаа алдсан. Мөн оны хоёрдугаар сарын 22-нд Увс аймгийн Баруун туруун сумын Хилийн цэргийн ангид харуулын үүрэг гүйцэтгэж байсан цэрэг оргож, ОХУ-ын Бүгд Найрамдах Тувагаас нас барсан байдалтай олдсон. 2019 оны гурадугаар сарын 28-нд Зэвсэгт хүчний 310 дугаар ангийн алба хаагч, ахлах ахлагч Г ангийнхаа элс ачсан “Зил-130” машинд дайруулж, харамсалтайгаар амиа алдсан хэрэг гарсан. 2019 оны тавдугаар сарын 14-нд Ховд аймгийн Зэвсэгт хүчний 123 дугаар ангийн цэрэг 18 настай залуу дунд чөмөг хугарч, хагалгаанд оров. 2019 оны тавдугаар сарын 26-нд Дорноговь аймгийн Хатанбулаг сум, Хилийн цэргийн 0168 дугаар ангийн байлдагч А амиа алдав.
2021 оны хоёрдугаар сарын 07-нд Дорноговь аймгийн  Хилийн цэргийн 0129-р ангид гэрээтээр алба хааж байсан 21 настай С харуулын байрандаа өөрийгөө боомилсон байдалтай амь насаа алдсан хэрэг гарчсан. Талийгаач Говь-Алтай аймгийн Шарга сумын харьяат бөгөөд ар гэрийнхэний мэдээлж буйгаар амиа алдахаасаа хэд хоногийн өмнө “Намайг ирж аваач, дарамттай байна” гэж утсаар ярьсан байдаг. Өөрөөр хэлбэл, он гарсаар хоёр эр цэрэг хорвоогоос явлаа. 
Өнгөрсөн хугацаанд цэрэг гэмтсэн, амиа алдсан хэрэг бишгүй гарсан. Зэвсэгт хүчнийнхэн ямар арга хэмжээ авав. Дор бүр нь хариуцлага тооцож, хатуу арга хэмжээ авч явж байсан бол энэ олон цэрэг хайртай ээж аав, ах дүүгээ орхиод явах байсан гэж үү. Буруутай этгээдэд нь хариуцлага тооцлоо гээд гомдолтойгоор хорвоогоос явсан цэрэг эрс минь сэргэхгүй. Үнэхээр “Өнгөрсөн борооны хойноос цув нөмрөв” л гэгч болж байна.

А.Сүх