Монгол үгсийн санд хонгил гэх үг хонгил, нүх, гарц хэмээн уншигддаг. Харин эцэстээ шударга бусын хонгил рүү чирдэг хуулийнхны бүлэглэл бий болж, үүнийгээ бид “хонгил”-ын шүүгч, өмгөөлөгч, прокурор хэмээн нэрийддэг болсон.”Хонгил”-ын шүүгч Х.Идэр, Ё.Цогтзандан, З.Болдбаатар нарын, “хонгил”-ын өмгөөлөгч Б.Баасанцогт нарын, “хонгил”-ын прокурор Ц.Насанбат нарын хэмээн цоллож ирсэн бол харин өдгөө “хонгил”-ын Ерөнхийлөгчтэй болжээ, бид.

Монгол Улсын Ерөнхийлөгч асан Ц.Элбэгдорж авах ч, хаях ч зүйлтэй хүн. Төрийн тэргүүний хувьд бусдаасаа давуу нь илтгэх урлагийг сайтар эзэмшсэн, энэ хэрээрээ дэлхийн олон улсын Ерөнхийлөгчидтэй найрсаг харилцаатай байж, Монгол Улсын нэр хүндийг өргөсөн гэдэгтэй хэн ч маргахгүй. Харин тэрбээр С.Зориг агсны амийг хөнөөсөн ноцтой хэргийг гол будлиантуулагч гэдгийг хэн мэдэх билээ.

Өдгөө нийгмээр нь цочролд оруулаад байгаа С.Зоригийн амь насыг хөнөөсөн хэргээр ял сонсоод буй Т.Чимгээ, Б.Содномдаржаа нарыг эрүүдэн шүүсэн хэргийг Ц.Элбэгдоржийн даалгавраар гүйцэтгэсэн, үүнийг нь хэрэгжүүлсэн гэдгийг хуулийнхны “нэвтэрхий толь” гэгддэг Хууль зүйн сайд асан, өдгөө ЗГХЭГ-ын дарга Ц.Нямдорж нэр ус, тодорхой баримттайгаар хэллээ. Хуульчийн амнаас тэр дундаа Ц.Нямдоржийн хувьд зүгээр нэг үгийг амнаасаа унагах хүн бүр биш. Хамгийн аймшигтай нь Б.Хурц, Г.Эрдэнэбат нарын зохион байгуулсан, олон айл өрхийн амьдралыг орвонгоор эргүүлсэн, тамд аваачсан, Монголд 1937 оныхоос ч дутахааргүй эрүүдэн шүүлт, тамлалт, мөрдөн мөшгилт амь бөхтэй оршин буйн ард Ц.Элбэгдорж байна гэдэг үнэхээр аймшигтай.

Т.Чимгээ, Б.Содномдаржаа, Б.Булган, хэргийн гол сэжигтэн байгаад гэртэйгээ шатаж амиа алдсан залуугийн эх, эцэг, ах дүү, гэр бүлийнхнийг нь 2-3 жил, өдөр шөнөгүй, 24 цагийн цагийн турш салахгүй мөрдөж, мөшгисөн нь сэтгэл зүйн хувьд ямар дарамт дор амьдарч ирснийг илтгэнэ.

Тэр ч бүү хэл ЭЦГ-ын даргын охиныг айлган сүрдүүлснээс бие нь муу байсан эцэг нь амиа алдсан, С.Зоригийн хэргийн өмгөөлөгчийн охиныг хар тамхины хэрэгт холбогдуулан айлган сүрдүүлсэн гэх жишээ баримт олон. Ер нь л эл хэргийг илрүүлэхийн төлөө явсан хэн бүхний амьдралыг там болгон хувиргасан хүн нь Б.Хурц, Г.Эрдэнэбат бөгөөд тэд Ерөнхийлөгч асан Ц.Элбэгдоржийн даалгавраар энэ бүхнийг гүйцэтгэсэн байна. Нэг талд нь олон айлын амьдрал орвонгоороо сүйрч байхад харин нөгөө талд олон хүнийг хэлмэгдүүлж, гар хөл болсон нөхөд ч бялуугаа хүртсэн байдаг.

ТЕГ-ын дарга асан Б.Хурц дэслэгч генерал болж, хэрэгт хяналт тавьж байсан Нийслэлийн хяналтын прокурор Г.Эрдэнэбат УЕП-ын газрын орлогч прокурор болон тушаал дэвшиж, Улсын Дээд шүүхийн Ерөнхий шүүгчийг зургаан жилээр нэг удаа томилдог атал улируулан хоёр удаа томилсон, хэргийг шүүхэд илтгэсэн шүүгч Б.Цогт Улсын Дээд шүүхийн Эрүүгийн хэргийн танхимын тэргүүн болсон зэрэг нь зөвхөн мөст уулын орой.

Үнэнд хэзээд гүйцэгддэг. Экс Ерөнхийлөгч Ц.Элбэгдорж “Би удахгүй шоронд орно” хэмээн телевизийн ярилцлагад орохдоо ам алдаж байсан билээ. Тэрбээр хэзээ нэгэн цагт үнэнд гүйцэгдэнэ гэдгээ мэдэрч байсан бололтой. Түүний даалгавраар хийсэн  ажиллагаа ийнхүү эхнээсээ илэрч, гол ажлыг гардан гүйцэтгэсэн Б.Хурц, Г.Эрдэнэбат нар ч бусдыг эрүүдэн шүүсэн, гүйцэтгэх ажлын журам зөрчсөн хэргээр ял сонслоо. Харин дараачийнх нь мэдээж хөшигний цаадах “эзэнтэн” байж таарна.

У.Тэргэл