Монгол Улсын Засгийн газар болон АНУ-ын Мянганы сорилтын корпорацын хооронд байгуулсан Мянганы сорилтын хоёр дахь Компакт гэрээ 2021 оны 3 дугаар сарын 31-ний өдөр хүчин төгөлдөр болж, Компакт гэрээний 350 сая ам.долларын буцалтгүй тусламжийн санхүүжилтээр Улаанбаатар хотын нийт ус хангамжийг нэмэгдүүлэх төсөл, хөтөлбөрийг хэрэгжүүлэх таван жилийн хугацаа албан ёсоор тоологдож эхэлснийг тэмдэглэх ёслолын арга хэмжээн 2021 оны 4 дүгээр сарын 5-ны өдөр Гадаад харилцааны яамны Зөвшилцөл танхимд боллоо. Цар тахлын үеийн нөхцөл байдлаас улбаалан арга хэмжээг Засгийн газар, УОК-оос гаргасан дүрэм журмыг чанд баримтлан цомхон хэмжээнд зохион байгуулав.
Монгол Улсын Гадаад харилцааны сайд, Монголын Мянганы сорилтын сангийн Удирдах зөвлөлийн дарга арга хэмжээг нээж хэлсэн үгэндээ “Өнөөдөр бид Улаанбаатар хотын ирээдүйн ус хангамжийн асуудлыг шийдвэрлэж, цаашид эдийн засгийн тогтвортой хөгжлийг хангах зорилго бүхий Мянганы сорилтын хоёр дахь Компакт гэрээ хүчин төгөлдөр болж, Компакт гэрээг хэрэгжүүлэх таван жилийн хугацаа албан ёсоор эхэлж буйг дуулгаж байгаадаа баяртай байна” гээд, “Өнгөрсөн хоёр жилийн хугацаанд бид Компакт гэрээ хүчин төгөлдөр болоход тавигдсан болзолт нөхцөлүүдийг биелүүлэхийн зэрэгцээ Компакт гэрээгээр хэрэгжүүлэх төсөл, хөтөлбөрийн бэлтгэлийг хангаж ажиллалаа. Дэлхий нийтийг хамарсан цар тахлаас үүдэлтэй олон бэрхшээл тулгарсан ч эрсдэлийг цаг тухайд нь үнэлж, үйл ажиллагаагаа тасралтгүй явуулсны үр дүнд Монгол Улсын Засгийн газар хүлээсэн үүргээ биелүүлж, төсөл хөтөлбөрүүдийг төлөвлөсөн хугацаандаа эхлүүлэх боломжийг ийнхүү бүрдүүллээ” хэмээн онцлон тэмдэглэв. Мөн тэрээр энэ бүх амаргүй ажлын ард гарахад тууштай дэмжиж хамтран ажилласан Барилга, хот байгуулалтын яам, Байгаль орчин, аялал жуулчлалын яам, Сангийн яам, Эрчим хүчний яам болон бусад яам, Улаанбаатар хотын Захирагчийн ажлын алба, Нийслэлийн Засаг даргын тамгын газар болон холбогдох газар, агентлагууд, тэр дундаа Хот, суурины ус хангамж, ариутгах татуургын ашиглалт, үйлчилгээг зохицуулах зөвлөл, Усны газар, УСУГ, ОСНААУГ, хүчин чармайлт гаргасан хүн бүрт баяр хүргэж, талархал илэрхийллээ.
АНУ-ын МСК-ын Гүйцэтгэх захирлын үүрэг гүйцэтгэгч Махмуд Бах цахимаар холбогдон мэндчилгээ дэвшүүлэв. Тэрээр АНУ, Монгол Улс хоорондын түншлэл, хамтын ажиллагааны энэхүү түүхэн чухал мөчийг тэмдэглэхээр хамт байгаадаа баяртай байгаагаа илэрхийлээд, “Компакт гэрээний санхүүжилт ердөө таван жилийн хугацаатай. Энэ хугацаанд Улаанбаатар хотын ус хангамжийг асуудлыг шийдвэрлэж, эдийн засгийн өсөлтийг дэмжих зорилтуудаа амжилттай хэрэгжүүлэхийн төлөө тууштай хамтран ажиллахаа илэрхийлж байна” хэмээн мэдэгдэв.
АНУ-аас Монгол Улсад суугаа Онц бөгөөд бүрэн эрхт Элчин Сайд Майкл Клечески энэхүү арга хэмжээний үеэр хэлсэн үгэндээ, “Ус хангамжийн хөтөлбөрийн энэхүү 350 сая ам.долларын санхүүжилт нь АНУ-аас Энэтхэг, Номхон далайн бүс нутагт оруулж буй хамгийн том хөрөнгө оруулалтын нэг бөгөөд ирэх таван жилийн хугацаанд Улаанбаатар хотын ус хангамжийг 80 хувиар нэмэгдүүлээд зогсохгүй олон олон ажлын байр шинээр бий болгоно” гэлээ.
Ёслолын арга хэмжээний төгсгөлд Компакт гэрээ хүчин төгөлдөр болсныг баталгаа болгон монгол бичгийн уран бичлэгээр “Ус амьдралыг тэтгэж, итгэл нөхөрлөлийг бататгана” хэмээн бичсэн тунхаглалд хүндэт зочид гарын үсэг зурж, дурсгалын зураг авахуулав.
Арга хэмжээний дараа Монголын Мянганы сорилтын сангийн Гүйцэтгэх захирал Э.Содонтогос хэвлэлийнхэнд ярилцлага өгөх үеэрээ “Компакт гэрээний санхүүжилтээр Улаанбаатар хотод ус хангамжийн хоёр шинэ үйлдвэр байгуулах ажлыг бодитоор эхлүүлэх илүү хариуцлагатай цаг үе өнөөдрөөс эхэлж байна. Бид энэ төсөл, хөтөлбөрийг таван жилийн хугацаанд багтаан бүрэн хэрэгжүүлж дуусгах учиртай. Үүний тулд дараах хоёр хүчин зүйлийг онцгой анхаарч ажиллана. Нэгдүгээрт, цаг хугацаа. Компакт гэрээ хэрэгжүүлж буй бусад улс орноос ялгаатай нь Монголд барилгын улирал харьцангуй богино. Тиймээс бид эрсдэлийн өндөр мэдрэмжтэйгээр, хийх ажлаа нарийн төлөвлөн, цаг хугацаатай уралдаж ажиллана. Хоёрдугаарт, чанар. Чанар манай эрхэм зорилго байх болно. Чанартай сайн үйлдвэр барихын тулд сайн компаниудыг сонгон шалгаруулж, Ковид-19 цар тахлын нөлөөлөл болон бусад аливаа эрсдэлийг урьдчилан тооцож, сэргийлж ажиллана. Монголын Мянганы сорилтын сан нь Засгийн газар, Улаанбаатар хотын захирагчийн ажлын алба, Нийслэлийн засаг даргын тамгын газар, хувийн хэвшил, эрдэмтэн судлаач, иргэд олон нийтийн хамтын хүч, харилцан ойлголцолд түшиглэн, өмнөө тулгарах аливаа саад бэрхшээлийг давж, Компакт гэрээг амжилттай хэрэгжүүлнэ гэдэгтээ итгэлтэй байна” гэлээ.
Монгол Улсын Засгийн газар болон АНУ-ын Мянганы сорилтын корпорац нь Мянганы сорилтын хоёр дахь Компакт гэрээ буюу Усны Компакт гэрээнд 2018 оны 7 дугаар сарын 27-ны өдөр гарын үсэг зурсан. Компакт гэрээний санхүүжилтээр нийслэл Улаанбаатар хотын өсөн нэмэгдэж буй эрэлт хэрэгцээг хангах ус хангамжийн шинэ эх үүсвэрүүд, Монголд анх удаа ус гүн цэвэршүүлэх болон хаягдал ус дахин боловсруулах хоёр томоохон үйлдвэр байгуулахаас гадна ус хангамж, ариутгах татуургын үйлчилгээний байгууллагуудын институцийн чадавхыг бэхжүүлэх, хууль, эрх зүйн орчныг сайжруулах замаар усны салбарын тогтвортой байдлыг нэмэгдүүлэх цогц хөтөлбөр хэрэгжүүлнэ. Ингэснээр 2026 он гэхэд Улаанбаатар хотын ус хангамж 80 гаруй хувиар нэмэгдэж, нийслэл хот баруун тийш өргөжин тэлэх, тэр чинээгээр эдийн засаг өсөх таатай боломж бүрдэх юм.
