Олны итгэлийг сэвтүүлсэн Н.Түвшинбаярын урамшууллыг цуцалъя

Бээжингийн олимпийн алт, Лондоны олимпийн мөнгөн медальт Н.Түвшинбаяр энэ сарын 2-ны өдөр Улсын өсөх идэр начин Э.Энхбатын эрүүл мэндэд ноцтой гэмтэл учруулсан  хэрэгт холбогдоод буй. Түүнийг өчигдөр хойшлуулшгүй ажиллагаагаар баривчлан, Цагдан хорих 461 дүгээр ангид саатуулаад байгаа юм.

Ард түмний хайр хүндэтгэлийг хүлээсэн олимпийн аварга ийнхүү танхайн хэрэгт холбогдсон нь олны дургүйцлийг төрүүлж, нийгэм тэр чигтээ Н.Түвшинбаярыг "шүүж" байна. Багын найзаа хүнд гэмтээж, өөрөө дүр эсгэн эмнэлэгт хэвтэж буй гэрэл зургийг дэлгэсэн нь ихээхэн  шүүмжлэл дагуулав. Гэхдээ шүүхээс гэм буруутайг нь тогтоогоогүй байхад хэнийг ч гэмт хэрэгтэн гэж үзэх учиргүй. Үнэхээр тэр буруутай бол хариуцлагаа хүлээх нь гарцаагүй. Олимпийн аварга байна уу, орцны жижүүр байна уу хууль тэгш үйлчлэх учиртай. Үүнийг ч олон түмэн харж, чих тавин чагнан суугаа. 

Харин үнэхээр түүний гэм буруутайг нь тогтоовол улсаас олгодог урамшуулал, алдар гавьяаг нь ч түдгэлзүүлэх хэрэгтэй. Ард түмний хайр хүндэтгэлийг дааж чадаагүйн төлөөс нь тэр.  

Олимпийн наадам, дэлхийн аварга шалгаруулах тэмцээнд медаль хүртсэн тамирчдад насан туршид нь сар болгон урамшуулал болгон 500 мянгаас 4 сая төгрөг олгох зарлигыг Монгол Улсын Ерөнхийлөгч асан Ц. Элбэгдорж 2012 онд гаргасан. Тодруулбал, олимпийн наадмаас алтан медаль хүртсэн тамирчинд 4 сая, мөнгөн медаь хүртсэн тамирчинд 3 сая төгрөгийн, хүрэл медаль хүртсэн тамирчинд 2 сая төгрөгийн урамшууллыг сар бүр олгодог. 

Харин дэлхийн аварга шалгаруулах тэмцээнээс олимпийн спортын зай, жинд алтан медаль хүртсэн тамирчинд 2 сая төгрөгийн, мөнгөн медаль хүртсэн тамирчинд 1 сая төгрөгийн, хүрэл медаль хүртсэн тамирчинд 500 мянган төгрөгийн урамшууллыг зөвхөн тухайн медаль хүртсэн тамирчинд сар бүр олгодог байна.

Ингэхээр Н.Түвшинбаяр аваргын тухайд сар бүр найман сар төгрөгийн урамшуулал хүртдэг байх нь. Энэ бол эх орныхоо нэрийг дэлхийн чихнээ цуурайтуулсан, ард түмэн, төр, засгийн түүнд өгч буй хайр хүндэтгэл. Нэгэнт олны хүндэтгэлийг дааж чадаагүй түүнд энэ урамшууллыг үргэлжлүүлэн авах эрх, ёс зүй байх учиргүй. 

Төр нэгэнт урамшуулал өгч чадаж буй шигээ эргүүлэн ч татдаг ч байх ёстой юм. Үүнийг ч ард түмэн хүсэж, шаардаж байна. 

Цагтаа гялалзаж явсан, олимпийн хос медальтан, дэлхийн хүрэл медальт түүнд төр, засаг бүхнээ барьсан. Хөдөлмөрийн аварга, Чингис хаан одонт,  Монголын Үндэсний Олимпийн хорооны Ерөнхийлөгч, Ерөнхий сайд Л.Оюун-Эрдэнийн зөвлөхөөр ажилладаг. Харин энэ бүхэн түүнд хэт хүндэджээ.  

Ямартай ч, ард түмний хайр, хүндлэлийг харуусал, халаглалаар эргүүлсэн түүнд холбогдох хэргийг удахгүй эцэслэж, үнэн мөн нь олон нийтэд ил болох буй за. 

Б.Баатар