Монголбанкны Тэргүүн дэд ерөнхийлөгч Ганбямбын Дөлгөөнийг сүүлийн үеийн “кран”-ы албан тушаалтан гэж хардаг хүн цөөнгүй. Улс төр, банк санхүүгйн салбарынхан ингэж дүгнэдэг нь нууц биш.

Түүнийг 2020 оны тавдугаар сарын 7-нд УИХ-аас Монголбанкны Тэргүүн дэд ерөнхийлөгчөөр томилоход уншиж байсан CV-ээр бол МУИС төгсөөд л монголбанкинд орж ажиллаж байжээ.

Тодруулбал, Г.Дөлгөөн нь 2008 онд МУИС-ийг Олон улсын харилцааны сургуулийг Олон улсын эдийн засагч мэргэжлээр төгсч, 2015 онд Люксембургийн их сургуульд Банк, санхүүгийн магистрын зэрэг хамгаалжээ.  Тэрбээр 2006-2007 онд “Жонон даатгал” ХХК-д менежер, 2008-2013 онд Монголбанкны Хяналт шалгалтын хэлтэст нягтлан бодогч, хянан шалгагч, 2014-2015 онд Люксембург Улсын “Шродерс“ санд дадлагажигч ажилтан, 2015-2016 онд Монголбанкны Хяналт шалгалтын газрын  ахлах хянан шалгагчаар ажиллаж байжээ. Мөн 2016-2018 онд Монгол Улсын Хөгжлийн банкны Дэд захирал бөгөөд Эрсдэлийн үнэлгээ, удирдлагын газрын захирал, 2018 оноос Төрийн банкны гүйцэтгэх захирлаар ажиллаж байгаад одоогийн ажил дээрээ ирсэн байдаг.

Ажил дээр гараад л тасралтгүй төрд ажиллаж ирсэн ч чамгүй хөрөнгө цуглуулж чадсан залуу гэцгээдэг. Г.Дөлгөөн нь нийтийн орон сууц 7, хашаа байшин 2, гарааш 1, өвөлжөө хаваржаа 1, нийт 1 759 000 000 төгрөгийн үнэ бүхий үл хөдлөх хөрөнгөтэй. 250 орчим сая төгрөгийн хадгаламжтай.

Мөн  “Жонон даатгал” ХХК, “Жонон холдинг” ХХК, Монголын хэрэглэгчдийн эрх ашгийг хамгаалах нийгэмлэгүүд нэгд, Монголын нано шинжлэх ухаан нанотехнологийн корпораци, Монголын нанотехнологийн корпораци, “Жонон” дээд сургууль зэрэг аж ахуйн нэгжид хувьцаа эзэмшдэг.

Энд нэг ноцтой зөрчил харагдаад байгаа юм. Г.Дөлгөөн Монголбанкны Тэргүүн дэд ерөнхийлөгчийн хувиар Хадгаламжийн даатгалын Үндэсний хорооны даргаар ажилладаг байгаа юм.

Энэ зөвлөлийн гишүүдээр Сангийн яамны Төрийн нарийн бичгийн дарга С.Наранцогт, СЗХ-ны дэд дарга Т.Цэрэнбадрал, Сангийн яамны ТЗУГ-ын Санхүүгийн хэлтсийн дарга С.Мөнгөнцэцэг, Монголбанкны ерөнхийлөгчийн эдийн засгийн зөвлөх Н.Батсайхан, Монголын банкны холбооны гүйцэтгэх захирал Л.Амар, Хадгаламжийн даатгалын корпорацийн гүйцэтгэх захирал Д.Дуулал нар ажилладаг.

Яагаад зөрчил харагдаад байна вэ гэхээр Г.Дөлгөөн “Жонон даатгал” компанийг эзэмшдэг. Гэсэн атлаа төрийн энэ даатгалын корпорацийн Үндэсний зөвлөлийг толгойлж байна.

Монголын Хадгаламжийн даатгалын корпораци нь “Банкин дахь мөнгөн хадгаламжийн даатгалын тухай хууль”-ийн хүрээнд төрөөс үүсгэн байгуулсан ашгийн төлөө бус хуулийн этгээд бөгөөд хадгаламжийн даатгалын үйл ажиллагааг эрхлэн явуулдаг. Ерөөс даатгалын гэдэг утгаараа “Жонон даатгал” ч, Хадгаламжийн даатгалын корпораци ч үйл ажиллагаа нь нэг чигтэй, төсөөтэй. Иймээс энэ нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль тогтоомжтой зөрчилдөх үү. Ийм асуудал үүснэ.

Энэ хүрээнд Хадгаламжийн даатгалын корпорацийн дотоод үйл ажиллагаа, боловсон хүчний томилгоо зэргийн асуудалд Г.Дөлгөөн хэр зэрэг холилдож буйг шалгаж үзэх шаардлагатай.

Нөгөөтэйгүүр хэдэн жилийн өмнө “Жонон даатгал”-ын үйл ажиллагаа сайнгүй байв. Тухайлбал, 2012 оны эцсийн байдлаар даатгалын зах зээл дээр үйл ажиллагаа явуулж буй компаниудыг хөрөнгийн хэмжээгээр нь харьцуулахад “Монгол даатгал” ХХК, “Бодь даатгал” ХХК-ийн хөрөнгө даатгагчдын нийт хөрөнгийн 30.0 хувийг эзэлж, “Жонон даатгал” ХХК-ийн 1.6 тэрбум төгрөгийн хөрөнгө хамгийн бага буюу зах зээлийн нийт хөрөнгийн 1.5 хувийг эзэлсэн. Тиймээс СЗХ-ноос 2013 оны нэгдүгээр сард  “Жонон даатгал” ХХК-ийн ердийн даатгалын үйл ажиллагаа эрхлэх тусгай зөвшөөрлийг хүчингүй болгож байв. Гэтэл өнөөдөр зөвхөн Хадгаламжийн даатгалын Үндэсний зөвлөлд Г.Дөлгөөний удирдлагад СЗХ-ны дэд дарга Т.Цэрэнбадрал ажиллаж байна. Энэ бас л асуудал...

С.Сүлд