Засгийн газрын шийдвэрийн дагуу өнгөрсөн бямба гарагаас эхлэн эрсдэлийн зэрэглэлийн түвшинг ахиулж бүх нийтийн бэлэн байдлын зэрэгт шилжүүлсэн. Өнөөдөр хөл хорионы гурав дахь өдөр үргэлжилж байна.

Засгийн газраас хөл хорионы үеэр иргэддээ эдийн засгийн дэмжлэг болгож Төрийн санд байрших ёстой байсан мөнгийг хишиг болгон тарааж иргэн бүрд 300 мянган төгрөг олгохоор шийдвэрлэсэн билээ. Учир нь хөл хорио тогтоохгүй энэ хэвээр явбал нас баралтын түвшин нэмэгдэхээс гадна халдварын тоо эрчимтэй нэмэгдэнэ хэмээн мэргэжилтнүүд зөвлөсөн юм. Үндсэндээ эрүүл мэндээ аврах уу, эдийн засгаа хамгаалах уу гэдэг хоёр том сонголтын дунд Засгийн газар зогссон гэхэд болно.

Иргэд ч ядаж хоосон хоригдохооргүй боллоо хэмээн баярлаж төр засгийн шийдвэрт хүндэтгэлтэй хандсан. Энэ удаа сүүлчийн хорио байгаасай гэсэн Ерөнхий сайдын үгэнд найдвар тавьж, хөл хорио үр дүнтэй байгаасай гэж бодсон хэрэг.

Гэтэл зарим нэг зохион байгуулалтгүй үйл ажиллагаанаас болоод халдвар хумих биш цааш тархах эрсдэл бий болчихоод байна. Тодруулбал, зөвшөөрөгдсөн байгууллагуудын ажиллагсдын тодорхой хувь нь тэгш, сондгойгоор замын хөдөлгөөнд оролцож, хувийн унаагүй нь нийтийн тээврээрээ үйлчлүүлж байна.

Нийтийн тээвэр өмнө нь хэрэгжиж байсан зохицуулалтаар цагийн хязгаартай иргэдэд үйлчилж байгаа бөгөөд юун халдвар хамгааллын дэглэм сахих. Хөл гишгэх зайгүй болтлоо иргэд чихэж байна. Ингэж зохицуулалт хийх юм уу, Шадар сайд аа. 

А.Сүх