Улсын начин Э.Энхбатыг БНСУ-д эмчлүүлэхээр “Хүннү эйр” компанийн тусгай үүргийн нислэгээр өчигдөр авч явсан бөгөөд ГССҮТ-ийн эмч, сувилагчид хамт ниссэн байна. Түүний эмчилгээний зардлыг “босгох” гэж бөхчүүд хандивын аяныг эхлүүлсэн ба энэ үеэр 43 сая төгрөг цугларчээ.

Хандив сэтгэлийн өглөг. Харин бөхчүүдийн бай, шагнал өндөр. Тэд 200-500 саяын үнэтэй автомашин хөлөглөж, тэрбумын тансаг хауст амьдарч, бэлгэнд азарга адуу, суурь хонь авах энүүхэнд, ард түмний хишиг хэмжээлшгүй. Баян тарганаа гайхуулан өрсөлдөх тэд амь нас нь хутганы ирмэгт байгаа нэгэндээ тусалж, дэмжихдээ ихэд хойрго улс аж. Хэдэн зуун саяар нь хишигт авах мөртлөө нэгэндээ өгч буй 700 орчим бөхийн нийт хандив ердөө 43 сая төгрөг. Бөхчүүд нэгнээ сэвхийтэл босгоод ирэх байх гэсэн олон нийтийн хүлээлт ийнхүү талаар болов. Ямартай ч, уг аяныг санаачилсан Булган аймгийн Гурванбулаг сумын харьяат бөх, улсын начин Б.Бат-Эрдэнэ  “Сэтгэл нэгтэй байж чаддаг нөхдөдөө болон сайхан бүхнийг үргэлжид уриалан биднийг нэгтгэж чаддаг гэргий нартаа юуны өмнө баярлалаа. 21 аймгийн нийт 696 бөх мөн уужуу ухаант сайхан сэтгэлт бөх сонирхогчид нэгдэж, улсын өсөх идэр, өрнөн дэлгэрэх, улам бадрах манлай начин Э.Энхбатынхаа эмчилгээний зардалд дэм болгон нийт 43.048.000 төгрөг цуглуулж чадлаа. Сайхан сэтгэлийн хандив маань үүгээр өндөрлөж байгааг мэдэгдэж байна.  Энэ их сэтгэл, эрүүл саруул болоосой гэсэн олон түмний хүсэл бүхэн биеллээ олно гэдэгт итгэж байна. Монгол бөхийн хийморь өнөд босоо байх болтугай”  хэмээжээ. Мэдээж, хүн бүрийн сэтгэлд талархах учиртай. Гэхдээ л монгол түмний хайрлаж, хүндэлж, тахин шүтдэг бөхчүүдийн үнэн сэтгэл нэг иймэрхүү.

Өмгөөлөгч Л.Данзанноров: Н.Түвшинбаяр эмчилгээ, онгоцны гээд бүхий л зардлыг дааж байгаа

Начин Э.Энхбатын эмчилгээний болоод нисэх тийз, зочид буудлын гээд бүхий л зардлыг Н.Түвшинбаяр даасан байна. Энэ талаар түүний өмгөөлөгч Л.Данзанноров “Н.Түвшинбаярын ар гэрийнхэн нисэх онгоцны зардлыг 100 хувь дааж, очоод хийлгэх эмчилгээний урьдчилгааг эмнэлгийн нь дансанд байршуулсан. Цаашид ч шаардлагатай эмчилгээний бүх зардлыг төлнө. Өмгөөлөгчийн хувьд Н.Түвшинжаргалтай байнга уулзаж байгаа. Тэрбээр байцаалт, тайлбараа өгч яваа. Н.Түвшинбаяр болон түүний гэр бүлийнхэн Э.Энхбатын биеийн байдалд маш их сэтгэл зовж байгаа. Тэд уулзахад хамгийн түрүүнд л Э.Энхбатын биеийг асууж, эмчилгээнд нь тусалж, шаардлагатай бүх зүйлийг хийгээрэй” гэж захиж байгаа гэв.

Ямартай ч, чамлахаар чанга атга гэдэг. Эн тэргүүнд улсын начин маань хамгийн гол нь эрүүл саруул болж, хөл дээрээ босох хэрэгтэй. Монголын ард түмний ерөөл   их ээ.

У.Тэргэл