Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаярыг эгүүлэн татах асуудлыг УИХ-аар хэлэлцэх үед нэгэн ноцтой асуудлыг сөхсөн нь Элчин сайд Ё.Отгонбаярын цахим шуудан руу хэн нэвтэрч, албан бичгийг олон нийтийн сүлжээнд ил болгов гэдэг байлаа. Элчин сайдын цахим хаяг руу нэвтрэхэд тусгайлан нууц үг, код, зөвшөөрөл хэрэгтэй байдаг. Энэ нь ганц Элчин сайдынх бус цаашлаад төрийн нууцад нэвтэрч, ил болгож буй ноцтой хэрэг гэдгийг УИХ-ын гишүүд онцолж, эзнийг нь олж, хариуцлага тооцох ёстой хэмээж байв. Энэ талаар Гадаад харилцааны сайд Б.Батцэцэг “Элчин сайдын яамны албаны цахим хаягуудад нэвтрэх нууц үг буюу интернэтийн компанитай хийсэн гэрээ, тухайн компанитай харилцах эрх зөвхөн Элчин зөвлөх И.Индранилад байдаг. ЭСЯ-ны албаны цахим шуудан алдагдсан талаар нууцын эрхлэгч, гуравдугаар нарийн бичгийн дарга Отгонжаргалын гаргасан тайлбар болон нийт дипломат ажилтнуудын тэмдэглэлийг хүлээж авсан. Элчин сайдын мэдээлэл алдагдсантай холбоотой бид тайлбар мэдээллийг бид нягталж байгаа. И.Индранил гэж Элчин зөвлөхийн асуудлыг бид яамныхаа удирдлагын төвшинд ойрын хугацаанд ярьж, шийдвэр гаргана” гэж байв.

Элчин зөвлөх И.Индранилаг хэрхэн ёс зүйгүй аашилдгийг УИХ-ын гишүүн Г.Дамдинням чуулганы танхимд ийнхүү хэлж байв. “Зандаахүүгийн Энхболдын дүү И.Индранил гэж нэг нөхөр  Гадаад харилцааны яаманд гуравхан сар ажиллачихаад Элчин зөвлөх буюу Элчин сайдын дараагийн албан тушаалд томилогдсон. Архи уугаад, амьтан хүн зодоод бужигнуулаад яваа дуулдах юм. Гадаад харилцааны сайд энэ хүнээ татаж болдоггүй юм уу” хэмээж байв.

Мөн үүнтэй зэрэгцэн Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаяр Монгол руугаа буцах хүсэлтээ Гадаад харилцааны яаманд албан ёсоор гаргасан юм. Монгол Улсын Ерөнхийлөгчийг Ё.Отгонбаярыг эгүүлэн татах асуудлыг УИХ-д оруулсан ч дэмжлэг аваагүй. Тиймээс эгүүлэн татан зарлиг гаргаснаар Элчин сайд Ё.Отгонбаяр ажлаа хүлээлгэн өгөхөөр болсон байна.

У.Тэргэл