Олимпын аварга, МҮОХ-ны ­Ерөнхийлөгч Н.Түвшинбаяр нь согтуугаар багын найз, улсын начин Э.Энхбатыгаа хэрцгийгээр зодож, хүндээр гэмтээсэн явдал олон нийтийг гонсойлгосон. Тархиндаа хүнд гэмтэл авсан Э.Энхбат ухаан орохгүй байсан тул яаралтай эмчилгээ хийлгэхээр БНСУ-руу тусгай үүргийн нислэгээр авч явсан билээ.

Э.Энхбатын эмчилгээнд хамгийн багадаа 500 сая төгрөг шаардлагатай гэж байсан. Харин өвчтөн болон ар гэрийнхийг нь зөөвөрлөх нислэгийн нийт зардал 47 мянган ам.доллар болсон гэх мэдээлэл цахимаар тархсан. Харин бөхчүүд хандивын аян өрнүүлснээр 21 аймгийн бөхчүүд нийтдээ 43 сая төгрөгийг цуглуулж чадсан билээ.

Хамгийн гол нь улсын начин Э.Энхбат эрүүл саруул болох нь чухал юм. Найзыгаа хүндээр гэмтээсэн Н.Түвшинбаяр эмчилгээний зардлын урьдчилгааг хэдийнэ шилжүүлсэн, эмчилгээ болоод ар гэрийнхнийг нь бүхий л зардлыг дааж байгаа, цаашид ч даах  талаар түүний өмгөөлөгч Л.Данзанноров мэдээлсэн.

Тэгвэл Олимпын аварга, МҮОХ-ны Ерөнхийлөгч Н.Түвшинбаярын хөрөнгө, орлого ийм байна. Тэрбээр нийтдээ 4.216.000.000 төгрөгөөр үнэлэгдэх хоёр орон сууц, үйлчилгээний зориулалттай үл хөдлөх 14 объект, барилга байгууламжтай.

Туулах чадвар сайтай 170.000.000 төгрөгийн үнэ бүхий автомашин, 1600 хонь, 300 адуу, 512 үхэр,  хурдан удмын 20 адуу, 20 тэмээ, 320 ямаатай. 1.900.000.000 төгрөгийн үнэ бүхий гурван ширхэг газар,  1.490.000.000 төгрөгийн үнэ хүрэх үнэт эдлэлтэй аж.

У.Тэргэл