Монгол Улсад ерөнхий боловсролын сургуулиудын нэгдүгээр ангийнхныг зургаан настайд нь элсүүлдэг болоод 14 жил өнгөрчээ. Балчир, нялхаас нь сургуульд оруулах гэлээ гэсэн эцэг, эхийн эсэргүүцэл тухайн үедөө өрнөөд тэгсхийгээд намжсан. Боловсролын яамныхан тухайн үед олон улсын стандарт, жишгийг Монголд нэвтрүүлж байна.Гаднын улсад бүр дөрөв, таван настайгаас нь сургуульд оруулдаг гэх тайлбар өгч байлаа.

Харин өнгөрсөн 14 жилийн хугацаа энэ шийдвэр, бодлого буруу байсныг нотолж, өнөөдөр боловсролын салбарынхан өөрсдөө хүлээн зөвшөөрөөд байна. Эцэг, эхчүүд ч зургаан настнууд хичээлээ дийлэхгүй ядарч, сульдан, стресс, ядаргаанд орж, сэтгэл зүйн болоод бие махбодын хувьд балчирдаж байгааг олонтаа хэлж, энэхүү шийдвэрээ эргэн харахыг удаа дараа сануулж ирсэн юм. Тиймдээ ч Боловсрол, шинжлэх ухааны яам нэгдүгээр ангид сурагчдыг долоон наснаас нь элсүүлэх асуудлыг судалж эхэлсэн. Ажлын хэсэг гарсан тухай мэдээлэл байна. Мөн Хүний эрхийн үндэсний комиссоос ч Засгийн газарт энэ талаарх саналыг хүргүүлсэн байна. Ялангуяа  малчин гэр бүлд хүндээр тусч буйг судалгааны дүнтэй нь хамт илгээжээ.

У.Тэргэл