Манай улсад 2020 оны гуравдугаар сарын 10-нд Франц иргэнээс халдварын анхны зөөвөрлөгдсөн тохиолдол бүртгэгдсэнээс хойш жил гаруйн хугацаа өнгөрлөө. Харин дотооддоо халдвартай нүүр тулаад хагас жилийг үдэх нь. Франц иргэн буюу иргэдийн нэршсэнээр Анх-Отгоноос халдвар илэрснээс хойш дотоодод халдвар алдсан байж болзошгүй хэмээн сэрэмжилж хаврын улирлын хичээл, сургуулийн үйл ажиллагааг зогсоож, теле буюу цахим хэлбэрт шилжүүлсэн. 

Энэ хичээлийн жилийг ч хүүхдүүд гэрээсээ үдэж байна. Хүүхдүүд өдөржин зурагт, утасны дэлгэц ширтэж ядарч байна. Теле хичээл үр дүнгүй, хүүхдүүд ойлгохгүй байна хэмээх эцэг эхчүүдийн гомдол цахим сүлжээнд их хөвөрдөг. Гэхдээ нөхцөл байдлыг ойлгож эцэг эхчүүдийн аль гэртээ байгаа нь хүүхдийнхээ хичээлд нь тусалж, хамтран хийх шаардлагатай байна. 

Учир нь өнөөдрийн тахал бол коронавируст халдварт өвчин болоод буй ч ирээдүйн "тахал" хүүхдүүдийн хичээлийн хоцрогдол болоод байна.

Энэ талаар БШУ-ны сайд Л.Энх-Амгалан "ЕБС-ийн сурагчид 2020 онд 75 өдөр буюу сургалтын 45-47 хувийг теле хичээлээр, 2021 онд орон нутагт 75 өдөр буюу сургалтын 45 хувь. Нийслэлд 85 өдөр буюу сургалтын 52 хувь, хугацааны хувьд нэг бүтэн жил, судлах агуулгын хувьд 1-1.5 жил хоцорч сурлагын хоцрогдолд орох нөхцөл байдал үүссэн" хэмээн онцолсон юм. Тиймээс эцэг эхчүүд хүүхдийнхээ багштай хамтран уялдаатай ажиллаж, хүүхдийнхээ боловсролд санаа тавих шаардлагатай байгаа учир ирээдүйн эх орны эздийн төлөө хамтдаа хичээхийг уриалж байна. 

А.Сүх