Олимпийн аварга, МҮОХ-ны Ерөнхийлөгч Н.Түвшинбаяр багын найз улсын начин Э.Энхбатыгаа хэрцийгээр зодож, биед нь хүнд гэмтэл учруулсан нь олон нийтийг гонсойлгосон. Харамсалтай нь, Э.Энхбат өнөөдрийг хүртэл ухаан ороогүй. Өөрөөр хэлбэл, дөрөвдүгээр сарын 2-ноос хойш буюу нэг сар орчим ухаангүй байгаа юм. 

Түүнийг БНСУ-д эмчлүүлэхээр яаралтай авч явсан бөгөөд эхнэр нь очингуутаа 14 хоногийн тусгаарлалтад орж, харин Э.Энхбатыг Сөүлийн эмнэлгийн Сэхээн амьдруулах тасагт хэвтүүлж, тэрбээр хэд хэдэн том аппаратад орж, 20,30 дусал залгуулсан байдалтай байгаа аж.

Э.Энхбатын эхнэр Б.Нандинцэцэгийн тусгаарлалтын 14 хоногийн өчигдөр дууссан ба Сэхээн амьдруулах тасагт байгаа учраас гаднаас хүн оруулахгүй гэсэн. Маш хүнд өвчтөн байдаг тасаг учраас сахиургүй байдаг юм билээ. Тиймээс эмнэлгийнх нь үүдэнд сахиад сууж байна. Өдөр болгон ямар мэдээ дуулдах бол гэж айж, сандарсаар түгшүүртэй хэцүү байна гэв.

Онгоцонд хэдэнтээ бие нь муудан, түгшүүртэй явсан ч ямартай ч начин маань эмнэлэгтээ хүрч чадсан. Харин эмч нар нь “Ийм тохиолдол бараг анх удаа харж байна. Хүнийг ийм болтол нь зодно гэдэг” гээд толгой сэгсэрч, хэрэв 1-2 хоног л хэтэрсэн бол найдваргүй байсан гэсэн байдаг. Эхнэр Б.Нандинцэцэг нь “Хэрэв тэр өдөр л хүмүүстэй уулзаагүй байсан бол өнөөдөр эрүүл байх байсан шүү дээ. Гурван хүүхэд, аав, ээж, хань, ах, дүү нь амьдын тамд байна. Саяхан л эрүүл саруул гэрийнхээ хойморт суугаад хоолоо идэж, хүүхдүүдээ эрхлүүлээд, аав, ээжтэйгээ зүв зүгээр утсаар яриад байж байсан гэж бодохоор л хэцүү юм хэмээгээд сэтгэлийн хаттай байхыг хичээж, Монголын ард түмний итгэл, сэтгэлээр эрүүл саруул болно гэдэгт найдаж суугаагаа хэлж байна. Монгол түмний заяа түших биз ээ.

У.Тэргэл