МҮХАҮТ-аас татвар, нийгмийн даатгал, хэвийн бус зээлийн хэмжээ, аж ахуйн нэгжүүдэд өршөөл үзүүлэх асуудлыг УИХ, Засгийн газарт тавих замаар эдийн засгийг дахин сэргээхэд анхаарч ажиллана гэж МҮХАҮТ-ын Ерөнхийлөгч О.Амартүвшин мэдэгдээд байгаа билээ.

Тэрбээр “Нийгмийн даатгалын санд 190 тэрбум төгрөгийн өр үүссэн. Нийт 50 мянга орчим аж ахуйн нэгж бүртгэлтэй байгаагаас 55 орчим хувь нь өртэй байна. Энэ 55 хувь дахь өртэй компаниуд Засгийн газрын хэрэгжүүлж байгаа хөнгөлөлттэй хөтөлбөрт хамрагдах боломжгүй нь тодорхой. Татвар болон нийгмийн даатгалын өртэй, Монголбанкин дахь хэвийн бус, муу зээлдэгчийн санд бүртгэлтэй иргэн, аж ахуйн нэгжүүдийг муу зээлдэгчийн бүртгэлээс хасч, дахин шинэ гараанаас эхэлж, үйл ажиллагаагаа хэвийн үргэлжлүүлэх нөхцөлийг бүрдүүлэх шаардлагатай байна" хэллээ.

Үнэхээр нийгэмд энэ асуудал хүлээлт үүсгээд байгаа. Аар саархан зүйлээс болж Монголбанкны хар жагсаалтад орсон иргэн, аж ахуйн нэгж олон. Цар тахлын энэ хүнд цагт нэг удаадаа энэхүү өр, зээлийг тэглэж, шинэ гараанаас эхэлбэл үүн шиг дэмжлэг үгүй.

Тиймээс аж ахуйн нэгж, байгууллагууд МҮХАҮТ-ын Ерөнхийлөгч О.Амартүвшиний санаачилга, саналыг дэмжин төр, засагт цаашлаад Монголбанкинд  хандахаар болж, гарын үсэг цуглуулаад эхэлжээ. 

У.Тэргэл