Эрх мэдэл албан тушаалтнуудын хариуцлагагүй үйлдлийн улмаас эрдэнэт хүний амь нас дээсэн дөрөөн дээр ирж, үхэл, амьдралтай тэмцэлдэж буй харамсалтай мэдээг цахим сүлжээнээс олж уншив. Уг мэдээллийг дагуу бид холбогдох хүмүүстэй уулзаж, асуудлыг хөндлөө.

Коронавирусний цар тахлын улмаас хатуу хөл хорио тогтоож, халдвар хамгааллын дэглэм мөрдөн ажиллаж, амьдрахыг Улсын Онцгой комисс болоод холбогдох албаныхан хэлж, анхааруулж, тушааж буй. Тиймээс ч гамшгийн үеийн бэлэн байдлын зэрэглэлд авч хэрэгжүүлэх арга хэмжээний жагсаалтыг хүртэл тодорхой гаргасан.

Гэтэл  Баянгол дүүргийн Засаг даргын захирамжийн дагуу тус дүүргийн Сургуулийн өмнөх боловсролын байгууллагуудад шалгалт нэрээр олон хүнийг нэг дор бөөгнөрүүлсний улмаас Баянгол дүүргийн ...дугаар цэцэрлэг халдварын голомт болжээ.  

Өдгөө тус цэцэрлэгээс улбаатай цэцэрлэгийн багш, ажилчид, тэдний гэр бүл гээд нийт 30 гаруй хүн коронавирусээр өвчлөөд байна.

Үүгээр ч зогсохгүй хэдхэн сарын дараа гавьяаныхаа амралтад суух байсан багш өнөөдөр коронавирусний халдварын маш хүнд оноштойгоор үхэл, амьдралтай тэмцэж байгаа аж. Мөн “Шинэ хүнтэй болох нь” хэмээн баярлаж явсан багш ч халдвараар өвчилж, өнөөдөр хэвлий дэх үр нь эсэн мэнд мэндлэх эсэх нь ч эргэлзээтэй байдал үүсчээ.

Баянгол дүүргийн Засаг даргын 2021 оны гуравдугаар сарын 24-ны А/127 тоот захирамжийн дагуу цэцэрлэгүүдэд шалгалт хийсэн. Ингэхдээ олон хүнийг нэг дор бөөгнөрүүлсэн нь эрсдэл үүсгэсэн болохыг өөрийн цахим хуудаснаа бичсэн дугаар цэцэрлэгийн эрхлэгчийг Баянгол дүүргийн нэр бүхий албан тушаалтан 9109..... дугаараас залгаж “Постоо устга, эс бөгөөс цагдаад өгнө” хэмээн дарамталсан байна.

Тухайн цэцэрлэгийн эрхлэгч Б-тай холбдогдож, асуудлыг тодруулахад, “Дүүргийн Засаг даргын захирамжаар тодорхой цэцэрлэгүүдэд шалгалт хийсэн. Шалгалтын багийнхан олноороо цэцэрлэгүүдэд ирж, багш ажилчдыг зөвхөн санал асуулга авахын тулд нэг дор бүгдийг нь цуглуулж, халдвар хамгааллын дэглэм зөрчсөний улмаас ...дугаар цэцэрлэг өнөөдөр халдварын голомт болж, нэг багшийн амь нас эрсдэлд ороод байгаа. Би энэ талаар л цахим хуудастаа бичсэн юм. Гэтэл дүүргийн нэр бүхий албан тушаалтан залгаж, постоо устгахыг шаардаж, дарамталсан. Би тэр хүний ярианы бичлэгийг хийж авсан байгаа.

Би худлаа зүйл огт бичээгүй. Бүх зүйл баримттай үнэн. Би ямар нэгэн байдлаар улстөржиж, хэн нэгнийг харлуулахыг хүсээгүй. Багш ажилчид, тэдний гэр бүлийг эрсдэлд оруулсан хариуцлагыг хэн хүлээх ёстой вэ гэдгийг л өөрийнхөө цахим хуудсанд бичсэн. Гэтэл өнөөдөр тэд бус бид буруутан болчихлоо” гэлээ.

Тиймээс бид халдварын голомт болсон цэцэрлэгийн эрхлэгч О-той холбогдов. Тэрбээр “Коронавирусний цар тахалтай холбоотойгоор манай байгууллага халдвар хамгааллын дэглэмээ баримталж, цахимаар ажиллаж байсан. Гэтэл гуравдугаар сарын 24-ний өдөр шалгалт хийх хүмүүс нь утасдаж, “Дүүргийн Засаг даргын захирамжаар танай цэцэрлэгт шалгалт хийнэ. 12 цаг гэхэд ажилчдаа бэлэн цуглуул” гэсэн. Би ч тухайн үед “Халдварын хүнд үед ингэж олноороо цуглах нь эрсдэлтэй юм биш үү, ямар учраас ийм үед заавал шалгалт хийж байгаа юм бол” гэдгийг тодруулсан ч “Дүүргийн Засаг даргын захирамжаар” гэх хариултыг өгсөн.

Манай хамт олон ч хэлсэн цагт нь цугларсан.

Гэтэл шалгалтыг ахлах хүн нь биднийг цугларснаас гурван цагийн дараа ирсэн. Энэ хугацаанд бид бүгдээрээ цэцэрлэгийнхээ гадаа хүлээж байсан учраас даарч хөрч байгаагаа хэлэхэд “Цэцэрлэгтээ ороод зааландаа хүлээж бай” гэсэн.

Ингээд шалгалтаа хийж, олон цаг хүлээлгэсэн багш, ажилчдаас сэтгэл ханамжийн судалгаа авч, зарим нэгэн зүйлийг тодруулчихаад явуулсан. Би ч дүрэм журмынх нь дагуу шалгуулсан.  Гэтэл дөрөвдүгээр сарын 5-ны шөнийн 23 цагт ирж баримт авсан. Мөн 12-ны өдөр шалгалтын багаас дахин залгаж, няравтайгаа хамт цэцэрлэг дээрээ ирэхийг шаардсан. Тухайн үед хатуу хөл хорио тогтоосон, автомашин явахгүй, нийтийн тээвэр цагийн хуваарийн дагуу явж байсан болохоор энэ бүхнийг хэлж учирлахад “Заавал ир” гэсэн. Тэгээд гэрээсээ явган алхаж, цэцэрлэг дээрээ очоод хүүхдийн хэдэн хөнжил, агуулахад байсан эд зүйлсээ тоолуулсан.

Гэтэл дөрөвдүгээр сарын 13-ны өдөр манай нярав халдвар авсан нь батлагдаж, улмаар 15-ны өдөр миний хариу эерэг гарсан. Ингээд л манай байгууллагын багш, ажилчид халдвар авсан нь ээлж дараагаар батлагдаж, тэдний гэр бүл ч өвчилсөн.

Тухайн шалгалт халдвар хамгааллын дэглэм зөрчсөн учраас бид ингэж олноороо өвчиллөө гэж дүгнэж байгаа. Үүнээс өмнө нэг ч багш, ажилчид, тэдний гэр бүл, ойр дотныхон халдвар аваагүй байсан.

Нэг настай багшийн бие маш хүнд байгаа. Тэр багшийн маань бие хурдан эдгээсэй л гэж залбирч байна. Би хэт даарснаас бол хатгаа авч, улмаар коронавирусний халдвараар өвчилж, нэлээд хүнд эмнэлэгт очоод 11 хоног эмчлүүлээд эмнэлгээс гараад байна. Өчигдөр манай гэр бүлийн хүний хариу эерэг гарч, эмнэлэгт хэвтсэн.

Ер нь энэ вирус халдвар авснаас хойш 10-14 хоногийн дараа илэрдэг гэдэг нь үнэн юм гэдгийг л ойлгоод сууж байна. Ингээд бодохоор яг тэр шалгалтын үеэр халдвар тархсан гэдэг нь ойлгомжтой байгаа юм. Шалгалт хийсэн Баянгол дүүргийн Төрийн сангийн ажилчдаас халдвар илэрсэн байх ч магадлалтай байгаа” гэлээ.

Цар тахлыг үл хайхран УОК, НОК-оос ч илүү эрх мэдэл гаргасан эрхмүүдийн хариуцлагагүй үйлдлийн улмаас ийнхүү бүхэл бүтэн нэг байгууллагын ажилчид, тэдний ар гэрийнхэн эрсдэлд ороод байгаа юм. Үүний хариуцлагыг хэн хүлээх вэ.    

Үргэлжлэл бий.  

Б.Баатар