ШШГЕГ-ын харьяа Цагдан хорих ангиудад коронавирусний халдвар тархаж, голомт болсон талаар мэдээлж байгаа. Үүнтэй холбоотойгоор ХЭҮК-ийн гишүүд цагдан хорих ангиудад ажиллажээ. Энэ талаар ХЭҮК-ийн гишүүн Ж.Хунантай ярилцлаа.
-Өнөөдрийн байдлаар цагдан хорих ангиудад нөхцөл байдал ямар байна вэ. 300 гаруй хоригдол, хоригдогч “Ковид”-ын халдвар авсан гэсэн мэдээлэл байна?
-ХЭҮК хорих ангиудад очиж, нөхцөл байдалтай танилцлаа. Хорих ангиудад гуравдугаар сарын 21-нээс хойш коронавирусний халдвар тархсан мэдээлэл байсан. Хорих 409, 461 дүгээр ангид очин нөхцөл байдалтай танилцан, удирдлагуудтай нь уулзан ямар бэрхшээл байгаа талаар ярилцаж, үйлчилж буй дүрэм журамтай нь танилцсан. Ингэснээр яаралтай арга хэмжээ авах шаардлагатай гэж үзсэн. Манай хорих ангиудад агааржуулалт шаардлага хангахгүй, хүмүүс бөөгнөрсөн байдалтай байгаа тул ташраараа халдвар авах нөхцөл бүрдсэн байна гэж харж байгаа. Дөрөвдүгээр сарын 20-ны байдлаар гэхэд л, 329 хоригдол, хоригдогч халдвар авсан байна. Тэр цагаас хойш өнөөдрийг хүртэл нэмэгдсэн байхыг үгүйсгэхгүй.
-Коронавирусний халдвар авсан хоригдлуудын дунд хүнд хүн байна уу?
-329 хоригдол, хоригдогчоос 109 нь эдгэрсэн гэсэн мэдээлэл өгсөн. Хорих 461 дүгээр ангийн эмнэлэгт 63 хүн, ХӨСҮТ-д хоёр, Цэргийн төв эмнэлэгт нэг хүнийг тус тус шилжүүлэн эмчилж байгаа ба 150 хүнийг цагдан хорих байрандаа тусгаарлан ажиглаж байгаа гэсэн мэдээлэл өглөө.
-Халдвар анх хаанаас хэрхэн дэгдэв. Энэ талаарх шалтгаан нөхцөлийг хэрхэн тайлбарлаж байна вэ. Ер нь хорих ангиудад халдвар хамгааллын дэглэм ямар байна вэ?
-Хорих анги руу эргэлт ордог, гэрийнхэн нь очиж уулздаг. Хүнсний түгээлт хийж байна. Тиймээс яг хаанаас халдвар тархав гэдгийг тогтооход хэцүү. Бичиг цаас дамжуулж өгсөн хүн халдвартай байхыг үгүйсгэхгүй. Олон таамаг байна. Харин өнөөдөр буруутныг хайх биш харин яаж багасгах вэ, бусдад халдварлуулахгүй байхад яах вэ гэдгээ гол анхаарах ёстой. Ковидын хууль гараад байгууллагууд тодорхой дүрэм журам гарган мөрдөж ажиллаж байгаа. Энэ дагуу ШШГЕГ-ын даргын баталсан дүрэм журам үйлчилж байгаа. Өөрсдийн бүх нөөцөө дайчилж ажиллаж байгаа гэж харагдсан. Өөрсдөөс нь хамаарахгүй хүчин зүйл гэж байна. Байрны агааржуулалтын систем байна. Төсвийг нь хуваарилаагүйгээс хамаараад хоол тэжээл, амин дэм дутагдалтай байна. Тиймээс нөхцөлийг сайжруулах, дархлааг дэмжих хоол хүнсийг нэмэгдүүлэх, сургалт сурталчилгаа явуулах, шуурхай арга хэмжээ авах шаардлагатай байна. Дээр нь халдвар авсан хүмүүсийг 2-8-аар нь нэг өрөөнд тусгаарлаж байгаа нь ихээхэн эрсдэл дагуулж байгаа юм. Олон улсын байгууллага ийм тохиолдолд нэг нэгээр нь тусгаарлах чиглэл зөвлөмж өгч байгаа. Үүнийг мөрдөх нөхцөл байдал, нөөц боломж хомс байна.
-Хууль сайдад зөвлөмж хүргүүлж байгаа гэлээ. Агуулга нь юу байна. Хэзээ зөвлөмжийг хүргүүлэх вэ?
-Албажуулаад өнөөдөр явуулна. Зөвлөмжид эн тэргүүнд байр савны асуудалд анхаарах, өрөө тасалгааг нэмэгдүүлэх, ганцаар тусгаарлах, түгээж байгаа хоол хүнсийг илчлэг болгож, дархлаа дэмжих нэмэлт бүтээгдэхүүн түлхүү өгөхийг зөвлөсөн. Хамгийн гол нь санхүүжилтийг яаралтай шийдвэрлэж өгөх асуудлыг тавьсан. Мөн “Ковид”-ын үед цагдан хорихоос аль болох зайлсхийх, түр түдгэлзүүлэх, хойшлуулахыг зөвлөсөн. Энэ хүрээнд арга хэмжээ авах шаардлагатай байна. Тухайлбал, 461 дүгээр хорих ангид 5 сартай жирэмсэн хүнийг цагдан хорьсон байна. Давхар хүүхдийн эрхийг зөрчиж байна гэсэн үг. Тиймээс 55-аас дээш насны эмэгтэй, анх удаа гэмт хэрэг үйлдсэн болон 60 наснаас дээш эрэгтэй, суурь архаг өвчтэй хүмүүсийг аль болох цагдан хорихгүйгээр шийдвэрлэх, үнэхээр шийтгэх тогтоол гарсан бол хойшлуулж, түр түдгэлзүүлэх зөвлөмжийг хүргүүлж байгаа.
-Хорих ангиудад байгаа хүмүүсийг вакцинжуулалтад хамруулсан уу?
-Өнөөдрийн байдлаар, нийслэл, Дархан, Хархорин дахь хорих ангиудад байгаа хоригдол, хоригдогсдыг вакцины эхний тунд хамруулсан байна. Хоёрдахь тунд хугацаанд нь яаралтай хамруулах, мөн алба хаагчдын нахцөл хангамжийг асуудлыг зайлшгүй шийдвэрлэх шаардлагатай байна. Эмч нар, алба хаагчид тэндээ байрлаж, үүргээ гүйцэтгэж байх жишээтэй. Уртасгасан болон онцгой нөхцөлд ажиллаж байгаагийн урамшууллыг өгөх зайлшгүй шаардлагатай. Цаашлаад өмгөөлөгчдийг ажиллах нөхцөл боломжоор хангах, хэрвээ боломжгүй бол цахимаар уулзах нөхцөл боломжоор хангах шаардлагатай байна.
У.Тэргэл
