Монгол Улсын Ерөнхий сайд Л.Оюун-Эрдэнэ Засгийн газрын 100 хоног тохиож байгаатай холбогдуулан өчигдөр сэтгүүлчидтэй уулзан, нээлттэй ярилцлага өрнүүлсэн. Энэ үеэрээ нэгэн байр суурийг илэрхийлсэн нь Олимпийн аварга, МҮОХ-ны Ерөнхийлөгч Н.Твшинбаяртай холбоотой байлаа.

Ерөнхий сайд “Манай улс олимпод ихээхэн анхаарал хандууулж байгаа. Тиймдээ ч миний хувьд Н.Түвшинбаярыг зөвлөхөөрөө ажиллуулахаар сонгож авсан. Цаашдаа ч тэрбээр МҮОХ-ны Ерөнхийлөгч, Ерөнхий сайдын зөвлөх байх нь зүйтэй юм билээ. Мэдээж хүн л юм хойно алдана, ононо. Миний хувьд аваргын зөв, буруу гэж хэлэх нь ёс зүйгүй асуудал.

Гэхдээ Н.Түвшинбаяр гэдэг хүн нэгэн цагт тодруулбал, долоодугаар сарын 1-ний гэх хар дарсан аймшиг явдлын дараа монголчуудыг сэрээсэн, нэгтгэсэн. Монголд олимпын анхны алтан медалийг авчирсан гавьяатан мөн үү, мөн. Үүнийг хэн ч үгүйсгэж чадахгүй.

Тиймээс Н.Түвшинбаяр аваргын гаргасан амжилт, МҮОХ-ны Ерөнхийлөгч, багын найзаа зодсон энэ бүхэн тус тусдаа асуудал. Энэ бүхнийг ялгаж, салгаж ойлгох хэрэгтэй. Тийм ухаан ч Монголын ард түмэнд бий гэдэгт найдаж байна” хэмээв.

Энэхүү байр сууринаас харвал, Н.Түвшинбаяр аваргыг Ерөнхий сайд зөвлөхөөрөө үргэлжлүүлэн ажиллуулж, МҮОХ-ны Ерөнхийлөгчийн албан тушаал нь хэвээр хадгалагдах бололтой.

Н.Түвшинбаярын хувьд согтуугаар багын найз улсын начин Э.Энхбатыгаа хэрцгийгээр зодож, хүндээр гэмтээсэн хэрэгт цагдан хоригдож байгаа. Түүнийг анх 20 хоног, үргэлжлүүлэн 10, харин саяхан 15 хоногоор цагдан хорих хугацааг Хан-Уул дүүргийн шүүхээс сунгасан ба түүнийг ШШГЕГ-ын харьяа 461 дүгээр ангид саатуулаад байгаа юм. 

Харин харамсалтай нь, улсын начин Э.Энхбат ухаан оролгүй сар орчим болж байгаа. Уушги нь устаж, тархиндаа хүнд гэмтэл авсан тэрбээр хөл дээрээ боссон ч Н.Түвшинбаяр хуулийнхаа дагуу хариуцлагаа хүлээж таарна.

Учир нь, өмнөх эрүүгийн хуульд хохирогч гомдолгүй гэсэн тохиолдолд хэргийг хөнгөрүүлж авч үздэг байсан бол 2017 оноос мөрдөж буй Эрүүгийн шинэ хуулиар гомдолгүй хэмээсэн ч хийсэн үйлдэлд нь ял шийтгэл ногдуулдаг болсон. Тиймээс Н.Түвшинбаяр аварга шүүхийн өмнө хэргээ дэнслүүлж таарах нь. Түүний үйлдэлд 5-12 жилийн ял оноох магадлалтай гэдгийг хуульчид ч хэлсэн. Ямартай ч, Ерөнхий сайд түүний байгуулсан гавьяа, хөлс, хөдөлмөрийг үнэлж цааш түлхсэнгүй. Харин ч алдаа, оноотой нь хүлээж аваасай гэсэн мессежийг нийгэмд өглөө.

У.Тэргэл