Одоогоос хоёр жилийн өмнө буюу 2019 оны тавдугаар сарын 17-ны өдөр УИХ-ын гишүүн асан Г.Батхүү Төрийн ордонд амь насаа алдсан харамсалтай хэрэг гарсан билээ. Уг хэргийн мөрдөн шалгах ажиллагаа өдгөө үргэлжилж байгаа. 

Г.Батхүү агсны амь насаа алдсан эл өдөр түүний төрсөн дүү П.Батчимэг цахим хуудсаараа дамжуулан уг хэргийг илрэхийг хүлээсээр байгаа гэдгээ илэрхийлжээ. Тэрбээр "Монгол түмэн, сайхан сэтгэлт ахан дүүс, нутгийн минь иргэд та бүхэн ахыг минь дурсан санаж, ямагт үгүйлэн суугаад үргэлж талархдаг шүү. Тэр нэг хар өдөр Төрийн тусгай хамгаалалттай, Төрийн ордонд нэгэн алтан амь үгүй болж, хорвоо хоосорсныг холбогдох хуулийн байгууллагууд, албан тушаалтнууд анзаарч ажилладаг юм болов уу.

Эцэс сүүлд нь уг хэргийг хаах хүртэл яриа сонсогдсон. Дэндүү харамсалтай....Энэ хэргийг илрүүлэх сонирхол энэ Төрд байгаа болов уу?

Хэзээ нэгэн цагт энэ учир битүүлэг хэргийн эзэн холбогдогч заавал түмний сонорт ил гарах нь дамжиггүй. Хэрэг хуучирдаггүй гэдэг. Хэрэг илрэхийг хүлээсээр.... Буян ном бум бумаар арвижих болтугай" гэжээ.

Б.Баатар